నవతెలంగాణ - ఉత్తర కొరియా: భారీ అణ్వాయుధాలను కలిగి ఉన్న ఉత్తర కొరియా మరోసారి తన బల ప్రదర్శన చేసింది. దేశ అణ్వాయుధ ఎదురుదాడి సామర్థ్యాన్ని సమూలంగా ప్రోత్సహించే ప్రయత్నంలో భాగంగా కొత్త ఘన-ఇంధన ఖండాంతర బాలిస్టిక్ క్షిపణి (ఐసీబీఎమ్) 'హ్వాసాంగ్-18' ను శుక్రవారం పరీక్షించినట్లు ఉత్తర కొరియా తెలిపింది. దీనితో దేశ నాయకుడు కిమ్ జోంగ్ ఉన్ పర్యవేక్షించారని వెల్లడించింది. ఈ పరీక్షతో తన ప్రత్యర్థుల్లో వణుకు పుట్టించేలా చేసిన ఉత్తర కొరియా తన అణ్వాయుధాలను మరింత విస్తరించే సంకేతాన్ని ఇచ్చింది. ఉత్తర కొరియా ప్రయోగిస్తున్న క్షిపణి తమ భూభాగంలో పడుతుందంటూ జపాన్ గురువారం ఆందోళన వ్యక్తం చేసింది. హొక్కైడో ప్రాంతంలోని జనాలు ఇళ్లను ఖాళీ చేయాలని ఆదేశాలు ఇచ్చి తర్వాత ఉపసంహరించుకుంది. నార్త్ కొరియా భూభాగంలో తాజా పరీక్ష జరగడంతో జపాన్ ఊపిరిపీల్చుకుంది. ఉత్తర కొరియా, యుఎస్ఏ మధ్య ఉద్రిక్తతను ఇది మరింత పెంచుతోంది.