నవతెలంగాణ - అస్సాం: ఒకే వేదికపై వందల సంఖ్యలో కళాకారులు నృత్యం చేస్తేనే చూసేందుకు రెండు కళ్లు చాలవు. అదే వేలాది మంది ఒకేసారి కాలు కదిపితే.. రికార్డులు బద్దలవడం ఖాయం. అస్సాం గువాహటిలోని సరుసజై స్టేడియంలో ఇదే జరిగింది. అస్సాం సంప్రదాయ నృత్యమైన బిహూ డ్యాన్స్‌ గిన్నిస్‌ బుక్‌ ఆఫ్‌ వరల్డ్‌ రికార్డులో చోటు దక్కించుకుంది. ఒకే వేదికపై 11,304 మంది కళాకారులు, నృత్యకారులు బిహూ నృత్యాన్ని ప్రదర్శించి ఈ రికార్డు సృష్టించారు. ఈ కార్యక్రమంలో గాయకులతో పాటు అస్సాం సంప్రదాయ వాయిద్యాలైన ధోల్‌, తాల్‌, గోగోనా, టోకా, పెపా వంటివాటిని వాయించే సంగీత కళాకారులు పాల్గొన్నారు.  
     అస్సాం సాంస్కృతిక వారసత్వానికి ప్రపంచ వ్యాప్తంగా గుర్తింపు తీసుకురావాలనే లక్ష్యంతో ఆ రాష్ట్ర ప్రభుత్వం ఈ కార్యక్రమాన్ని నిర్వహించింది. ఈ కార్యక్రమంలో పాల్గొన్న ప్రతీ ఒక్కరికి రూ.25 వేలు గ్రాంట్ ప్రకటించింది. రాష్ట్ర వసంతోత్సవాలను పురస్కరించుకుని నేడు రాష్ట్రానికి రానున్న ప్రధాని నరేంద్ర మోదీ చేతుల మీదుగా సర్టిఫికెట్‌ను అందజేయనున్నారు