నవతెలంగాణ - హైదరాబాద్
జగిత్యాల జిల్లా ధర్మపురి అసెంబ్లీ నియోజకవర్గంలో మంత్రి కొప్పుల ఈశ్వర్‌ ఎన్నిక వివాదంపై బుధవారం హైకోర్టులో విచారణ జరిగింది. 2019లో కొప్పుల ఈశ్వర్‌ బీఆర్ఎస్ అభ్యర్థిగా విజయం సాధించారు. అయితే, ఆయన ఎన్నిక చెల్లదని అందులో అవకతవకలు జరిగాయని కాంగ్రెస్‌ అభ్యర్థిగా పోటీ చేసి ఓడిపోయిన లక్ష్మణ్‌ కుమార్‌ హైకోర్టును ఆశ్రయించారు. అప్పటి నుంచి ఉన్నత న్యాయస్థానంలో కేసు విచారణ కొనసాగుతోంది. ఎన్నికలకు సంబంధించిన డాక్యుమెంట్లు, వీవీ ప్యాట్లు, సీసీ ఫుటేజీ కావాలని లక్ష్మణ్‌ మధ్యంతర పిటిషన్‌ దాఖలు చేశారు.
ఈ తరుణంలో ఇరువైపులా వాదనలు విన్న ధర్మాసనం స్ట్రాంగ్‌ రూమ్‌ సీల్‌ పగలగొట్టేందుకు జగిత్యాల కలెక్టర్‌కు అనుమతించింది. అన్ని పార్టీల సమక్షంలో స్ట్రాంగ్‌ రూమ్‌ తెరవాలని సూచించింది. రిటర్నింగ్‌ అధికారి కోరితే వాహనం, తగిన భద్రత ఇవ్వాలని ఆదేశించింది. అవసరమైతే వడ్రంగి, లాక్‌స్మిత్‌ సహకారం తీసుకునేందుకు న్యాయస్థానం అనుమతిచ్చింది. తదుపరి విచారణను హైకోర్టు ఈనెల 24కి వాయిదా వేసింది.
