నవతెలంగాణ - ఢిల్లీ
విమానం గాల్లో ఉండగా కొందరు ప్రయాణికులు గొడవకు దిగారు. దీంతో ఆ విమానాన్ని అత్యవసరంగా ల్యాండ్‌ చేయాల్సి వచ్చింది. ఈ ఘటన ఆస్ట్రేలియాలోని క్వీన్స్‌ లాండ్‌లో గత వారం చోటు చేసుకోగా ఆలస్యంగా వెలుగులోకి వచ్చింది. క్వీన్స్‌లాండ్‌ నుంచి నార్తరన్‌ టెరిటరీకు వెళ్తున్న ఓ విమానంలో ప్రయాణికులు గొడవ పడ్డారు. విమానం బయలుదేరిన కాసేపటికే ఓ 23 ఏండ్ల యువతి ఫ్లైట్ సిబ్బందితో అమర్యాదకరంగా ప్రవర్తించింది. అనంతరం తోటి ప్రయాణికులతో వాగ్వాదానికి దిగింది. క్రూ సిబ్బంది ఎంత హెచ్చరించినా వినలేదు. దీంతో చేసేదేమీ లేక విమానాన్ని వెనక్కి తిప్పిన పైలట్‌ గొడవ పడిన యువతిని క్వీన్స్‌లాండ్‌లో దింపేశారు. అనంతరం ఫ్లైట్‌ తిరిగి బయలు దేరింది.
             కొద్దిసేపటి తర్వాత దింపేసిన యువతికి సంబంధించిన వారు మరోసారి ఫ్లైట్‌లో గొడవ పడ్డారు. ఈ గొడవ కాస్తా తారాస్థాయికి చేరి ఒకరిపై ఒకరు చేయి చేసుకునే వరకూ వెళ్లింది. ఓ యువతి గాజు సీసాతో మరొకరిపై దాడి చేసేందుకు ప్రయత్నించింది. దీంతో విమానంలోని ఓ కిటికీ అద్ధం పగిలింది. ఈ తరుణంలో విమానం ల్యాండ్‌ అయ్యాక గొడవ పడిన వారిలో ఓ యువకుడు, ఇద్దరు మహిళల్ని ఆస్ట్రేలియా ఫెడరల్‌ పోలీసులు అదుపులోకి తీసుకున్నారు. ఈ ఘటనతో సంబంధం ఉన్న మొత్తం నలుగురిని అరెస్ట్ చేసినట్లు అధికారులు తెలిపారు.