- అమెరికా పరోక్ష మద్దతుతో డ్రోన్ల తో ఉక్రెయిన్‌ క్రెమ్లిన్‌ పైన దాడి
బుధవారం నాడు రష్యా ఫెడరేషన్‌ అధికార అధ్యక్ష నివాసంగా పిలువబడే క్రెమ్లిన్‌ పైన రెండు డ్రోన్ల దాడి జరిగింది. ఈ దాడి ఒక పథకం ప్రకారం చేసిన టెర్రరిస్టు దాడి అని, ఇది రష్యా అధ్యక్షుడు వ్లాడీమీర్‌ పుతిన్‌ పై ఉక్రెయిన్‌ చేసిన హత్యాప్రయత్నమని రష్యా విదేశాంగ మంత్రిత్వశాఖ ఆరోపించింది. క్రెమ్లిన్‌ పైన ఉక్రెయిన్‌ చేసిన దాడితో రష్యా ఉక్రెయిన్‌ పైన విరుచుకుపడుతుందని, దాన్ని సాకుగా తీసుకుని యుద్ధంలో నాటో ప్రవేశించవచ్చనే పథకం ఈ దాడి వెనుక ఉందని నిష్ణాతులు భావిస్తున్నారు.
ఈ దాడి జరిగిన తీరు అనేక అనుమానాలకు తావిస్తోంది. జెలెన్స్కీ ఉక్రెయిన్‌ ను వీడి నాటో భూభాగమైన ఫిన్లాండ్‌ చేరిన తరువాత ఈ దాడి జరిగింది. అంటే రష్యా ప్రతీకార దాడి నుంచి జెలెన్స్కీ ని తప్పించే వ్యూహంలో భాగంగానే ఇలా జరిగివుంటుంది. రష్యాపైన ఉక్రెయిన్‌ ప్రతి దాడి చేయనుందని మీడియాలో పదేపదే ఊదరకొట్టిన నెపథ్యంలో ఈ దాడి జరగటం గమనార్హం. ప్రజలు ఊహించినదానికంటే చాలా ఎక్కువగా ఉక్రెయిన్‌ సైనిక బలం క్షీణించిందని, నాటో దళాల సహకారం లేకపోతే ఉక్రెయిన్‌ ప్రతిదాడి ఘోరంగా విఫలం అయ్యే ప్రమాదం ఉందని ఈ మధ్యకాలంలో లీకైన పెంటగాన్‌ పేపర్లలో పేర్కొనటం జరిగింది.
ఈ దాడిపట్ల అమెరికా వ్యవహరించిన తీరు అత్యున్నత స్థాయిలో అమెరికా ప్రమేయం ఉందనటానికి ఆస్కారం ఉందనే భావన ఏర్పడుతోంది. అమెరికా విదేశాంగ కార్యదర్శి ఆంటోనీ బ్లింకెన్‌, అధ్యక్ష భవన(వైట్‌ హౌస్‌) ప్రెస్‌ సెక్రటరీ కరీన్‌ జీన్‌ పియర్‌ చేసిన ప్రకటనలు అమెరికా లెక్కలేనితనాన్ని, బాధ్యతారాహిత్యాన్ని ప్రతిబింబిస్తున్నాయి. ''రాత్రి రష్యా అధ్యక్షుడిని హత్య చేయటానికి ఉక్రెయిన్‌ డ్రోన్లతో దాడిచేసిందనే ఆరోపణపైన, ఈ యుద్ధంలో నాయకులపైన అటువంటి దాడులు జరగటంపైన అమెరికా వైఖరి ఏమిటి?'' అని వాషిగ్టన్‌ పోస్ట్‌ రిపోర్టర్‌ డేవిడ్‌ ఇగషియస్‌ ఆంటోనీ బ్లింకెన్‌ ను అడినప్పుడు ఆయన అమెరికాకు అటువంటి చర్యలతో సంబంధంలేదని అనకుండా ''తనను తాను రక్షించుకోవటానికి ఎటువంటి నిర్ణయాలు తీసుకోవాలనే విషయాన్ని మేము ఉక్రెయిన్‌ కే విడిచిపెడుతున్నాము'' అని ఆయన అన్నాడు. ''ఒకవేళ ఉక్రెయిన్‌ తనకుతానుగా రష్యా భూభాగంపైన దాడి చేయదలిస్తే అమెరికా ఉక్రెయిన్‌ ని విమర్శించదా?'' అని ఇగషియస్‌ మరలా అడిగినప్పుడు కూడా తిరిగి బ్లింకెన్‌ అలానే స్పందించాడు. ఆ తరువాత అమెరికా అధ్యక్ష భవన ప్రెస్‌ సెక్రటరీ జీన్‌ పియరీ నిర్వహించిన పత్రికా సమావేశంలో కూడా ఇదే ప్రశ్నను అడిగినప్పుడు ఆమె పుతిన్‌ పైన జరిగిన హత్యాప్రయత్నాన్ని ఖండించటానికి అంగీకరించలేదు.
రష్యా, ఉక్రెయిన్‌ మధ్య జరుగుతున్న యుద్ధంలో తనకు నచ్చని దేశంలో పాలకులను మార్చినట్టే రష్యా విషయంలో కూడా అదే లక్ష్యంతో అమెరికా పనిచేస్తోందని అర్థం అవుతోంది. అంటే తాను అధికారం నుంచి కూలదోసి, హత్య చేసిన మహమ్మద్‌ గడ్డాఫీ, సద్దాం హుస్సేన్‌ ల సరసన పుతిన్‌ ను కూడా అమెరికా చేర్చదలిచిందని అనుకోవలసివుంటుంది. 2003లో అమెరికా ఇరాక్‌ పైన జరిపిన దురాక్రమణను సమర్థించుకోవటానికి తన తండ్రిని హత్యచేయటానికి సద్దాం ప్రయత్నించాడని జార్జి డబ్యు బుష్‌ ఆరోపించాడు. మొదటి ప్రపంచ యుద్ధం కూడా ఆస్ట్రియాకు చెందిన ఆర్చ్‌ డ్యూక్‌ ఫ్రాంజ్‌ ఫెర్డినాండ్‌ హత్యతో ప్రారంభమైంది.
పుతిన్‌ ను హత్య చేయటానికి రష్యా అధ్యక్ష భవనంపైన జరిగిన దాడి విఫలమైనప్పటికీ అది రష్యా అధ్యక్ష భవనంపైన జరిగిన దాడే అవుతుంది. అప్గానిస్తాన్‌ పైన దాడిచేయటానికి ప్రధాన కారణంగాను, ఇరాక్‌ పైన దాడి చేయటానికి కారణాలలో ఒకటిగాను వరల్డ్‌ ట్రేడ్‌ సెంటర్‌ పైన, పెంటగాన్‌ పైన జరిగిన టెర్రరిస్టు దాడిని అమెరికా చూపింది. రష్యా అధ్యక్ష భవనంపైన దాడి చెయ్యాలని నిర్ణయించినప్పుడు అది యుద్ధాన్ని తీవ్రతరం చేస్తుందని ఉక్రెయిన్‌ కు తెలుసు.
బ్లింకెన్‌ ప్రకటన తరువాత అమెరికా, ఉక్రెయిన్‌ లు ఆ సంఘటనలో తమ బహిరంగ ప్రమేయం ఉందనటం నుంచి వెనక్కు తగ్గాయి. ''మేము పుతిన్‌ పైన దాడి చేయలేదు'' అని జెలెన్స్కీ ప్రకటించాడు. అయితే ''అగ్ని జ్వాలల్లో క్రెమ్లిన్‌'' అనే చిత్రంతో ఒక స్టాంపును విడుదల చేస్తామని ఉక్రెయిన్‌ పోస్టల్‌ సర్వీస్‌ చేసిన ప్రకటన జెలెన్క్సీ అబద్దాన్ని తేటతెల్లం చేస్తోంది. అలాగే అమెరికా అధికారులు కూడా ఈ దాడి గురించి ముందుగా అమెరికాకు ఏమీ తెలియదని న్యూయార్క్‌ టైమ్స్‌, వాషింగ్టన్‌ పోస్ట్‌ తదితర పత్రికలకు చెప్పారు.
యుద్ధాన్ని తీవ్రతరం చేయటానికి ఉక్రెయిన్‌ కు కావలసినంత స్వేచ్చను ఇచ్చినట్టు అమెరికా స్పందనను బట్టి అర్థం అవుతోంది. అంటే జెలెన్క్సీ ప్రభుత్వం చేస్తున్ననేరపూరిత చర్యల పర్యవసానం ప్రపంచం మీద పడుతుంది. అమెరికా తన సైనిక లక్ష్యాలను నెరవేర్చుకోవటం కోసం ఎంత దూరమైనా వెళ్ళేందుకు సంసిద్దంగా ఉందని, ఈ ప్రయత్నంలో అమెరికాకు ఎటువంటి షరతులూ లేని మద్దతును కొన్ని నాటో దేశాలు ఇస్తున్నాయి. పుతిన్‌ ను హత్య చెయ్యటం సబబేననే మూర్కత్వం, నిస్రుహతో కూడిన లెక్కలేనితనం అమెరికాను, ఐరోపాను ఆవహించింది. యుద్ధం తీవ్రతరం కావటమే కాదు అది తూర్పు ఐరోపా నుంచి పసిఫిక్‌ ప్రాంతందాకా విస్తరిస్తోంది. ఒక్క మాటలో చెప్పాలంటే మానవాళి భవిత చరిత్రలో ఎన్నడూ ఇంతగా ప్రశ్నార్థకం కాలేదు.
