- 9,10 తేదీల్లో పలుచోట్ల భారీవర్షాలు
నవతెలంగాణ బ్యూరో-హైదరాబాద్‌
అండమాన్‌ సముద్రంలో పదో తేదీన అల్పపీడనం ఏర్పడే అవకాశముందనీ, అది బలపడి 15,16 తేదీల్లో దక్షిణ ఒడిశా-ఉత్తర కోస్తాంధ్ర మధ్యలో తీరం దాటొచ్చని హైదరాబాద్‌ వాతావరణ కేంద్రం ప్రధాన అధికారి కె.నాగరత్న తెలిపారు. తిరోగమన నైరుతి రుతుపవనాలు వాయువ్య భారతంలోని కొన్ని భాగాల నుంచి ప్రారంభమయ్యాయని పేర్కొన్నారు. ఆగేయ బంగాళాఖాతం నుంచి దక్షిణ కేరళ వరకు సముద్ర మట్టం నుంచి 1.5 కిలోమీటర్ల ఎత్తులో ద్రోణి కొనసాగుతున్నదని వివరించారు.రాష్ట్రంలో వచ్చే ఐదు రోజులు తేలికపాటి నుంచి మోస్తరు వానలు పడే అవకాశం ఉందని తెలిపారు. అయితే, 9,10 తేదీల్లో మాత్రం వరంగల్‌, హన్మకొండ, జనగామ, సిద్దిపేట, రంగారెడ్డి, వికారాబాద్‌, సంగారెడ్డి, కామారెడ్డి, జయశంకర్‌భూపాలపల్లి, ములుగు, భద్రాద్రి కొత్తగూడెం, నాగర్‌కర్నూల్‌ జిల్లాల్లోని పలు ప్రాంతాల్లో భారీ వర్షాలు పడే అవకాశం ఉందని పేర్కొన్నారు.