- ఏపీ..తెలంగాణ సరిహద్దులో చిక్కిన ఎమ్మెల్యే తనయుడు
- రామకృష్ణ కుటుంబం ఆత్మహత్య కేసులో ఏ-2
నవతెలంగాణ-ఖమ్మం ప్రాంతీయప్రతినిధి
రాష్ట్రవ్యాప్తంగా సంచలనంగా మారిన ఎమ్మెల్యే తనయుడు వనమా రాఘవను శుక్రవారం రాత్రి అరెస్టు చేశారు. రామకృష్ణ కుటుంబం ఆత్మహత్య కేసులో ఏ-2గా ఉన్న అతడ్ని తెలంగాణ, ఏపీ సరిహద్దులోని దమ్మపేట, చింతలపూడిలో అదుపులోకి తీసుకున్నారు. కొత్తగూడెం ఎస్పీ కార్యాలయానికి తరలించారు. రాఘవను భద్రాద్రి పోలీసులు విచారిస్తున్నట్టు ఎస్పీ సునీల్‌ దత్‌ ధ్రువీకరించారు. తమ కుటుంబం ఆత్మహత్యకు వనమా రాఘవే కారణమంటూ మృతుడు పాల్వంచ నాగ రామకృష్ణ చివరిగా రాసిన సూసైడ్‌ నోట్‌, సెల్ఫీ వీడియోలో మాట్లాడిన మాటలు రాష్ట్రమంతా కలకలంరేపుతున్నాయి. వనమా రాఘవ ఎక్కడున్నాడో గుర్తించటానికి పోలీసు టీమ్‌లు గాలిస్తున్నాయి. రాఘవను అరెస్టు చేయాలని ప్రజా సంఘాలు, పలు రాజకీయ పార్టీలు డిమాండ్‌ చేశాయి.