నవతెలంగాణ బ్యూరో-హైదరాబాద్‌
పెరుగుతున్న ఎరువుల ధరలు తగ్గించాలని సీపీఐ రాష్ట్ర కార్యదర్శి చాడ వెంకటరెడ్డి ఆదివారం ఒక ప్రకటనలో కేంద్ర ప్రభుత్వాన్ని డిమాండ్‌ చేశారు. పెరుగుతున్న ఎరువుల ధరల పట్ల ఎలాంటి చర్యలు తీసుకోకుండా కేంద్రంలోని నరేంద్ర మోడీ ప్రభుత్వం నిమ్మకు నీరెత్తినట్టు వ్యవహరిస్తున్నదని విమర్శించారు. ఇప్పటికే పెరిగిన డీజిల్‌ ఆధారిత వ్యవసాయ యంత్రాల ఖర్చు రైతుకు తలకు మించిన భారంగా మారిందని తెలిపారు. మద్దతు ధర గిట్టుబాటు ధర లేక రైతులు అవస్థలు పడుతున్నారని పేర్కొన్నారు. కేసీఆర్‌ ప్రభుత్వం రైతుబంధు, రైతు బీమా అమలు చేయటం మూలంగా రైతులకు కొంతమేరకు ఉపశమనం కలిగిందని తెలిపారు. కార్పొరేట్‌ సంస్థలకు మొండి బకాయిల పేరుమీద రుణాలు మాఫీ చేసిన మోడీ ప్రభుత్వం, రైతులకు ఒక్క పైసా రుణమాఫీ చేయలేదని విమర్శించారు.