నవతెలంగాణ బ్యూరో-హైదరాబాద్‌
కరోనా వేగంగా వ్యాప్తి చెందుతున్న క్రమంలో అంగన్‌వాడీ కేంద్రాలకూ జనవరి 30వ తేదీ వరకు సెలవులను పొడిగించాలని తెలంగాణ అంగన్‌వాడీ టీచర్స్‌, హెల్పర్స్‌ యూనియన్‌(సీఐటీయూ అనుబంధం) రాష్ట్ర అధ్యక్ష, ప్రధాన కార్యదర్శులు ఎం.పద్మ, పి.జయలక్ష్మి, కోశాధికారి కె.నర్సమ్మ డిమాండ్‌ చేశారు. ఈ మేరకు వారు స్త్రీ, శిశు సంక్షేమ శాఖ కమిషనర్‌ దివ్వకు మెయిల్‌ ద్వారా వినతిపత్రాన్ని పంపారు. ప్రభుత్వ పాఠశాలలకు సెలవులు పొడిగిస్తూ రాష్ట్ర ప్రభుత్వం జీవో జారీ చేసిందనీ, అదే సందర్భంలో ఐసీడీఎస్‌ నుంచి ఇప్పటివరకూ ఉత్తర్వులు వెలువడలేదని తెలిపారు. పెద్ద పిల్లల గురించి ఆలోచించిన రాష్ట్ర సర్కారుకు చిన్నపిల్లలు పట్టరా? అని ప్రశ్నించారు.