నవతెలంగాణ-భద్రాచలం
భద్రాచలం ప్రభుత్వ ఏరియాస్పత్రిలో శిశువు మృతిచెందిన సంఘటన మంగళవారం చోటుచేసుకుంది. తూర్పు గోదావరి జిల్లా ఎటపాక మండలం కాపవరం గ్రామానికి చెందిన పసుపులేటి లక్ష్మి ఈ నెల 16వ తేదీ ఉదయం పురిటి నొప్పులతో ఆస్పత్రిలో చేరింది. ప్రసవానంతరం బిడ్డ క్షేమంగానే ఉందని వైద్య సిబ్బంది తెలిపారు. కాగా మంగళవారం అకస్మాత్తుగా బిడ్డ కామెర్లు, ఊపిరితిత్తుల సమస్య కారణంగా మరణించిందని వైద్య సిబ్బంది చెప్పారని బంధువులు ఆరోపిస్తున్నారు. వైద్యులు, నర్సులు పట్టించుకోకపోవడంతో శిశువు మృతి చెందిందని బంధువులు ఆరోపిస్తూ ఆస్పత్రి ఎదుట ఆందోళనకు దిగారు. కాగా అనారోగ్య సమస్యల కారణంగా శిశువు మృతి చెందిందని ఏరియా ఆస్పత్రి సూపరింటెండెంట్‌ డాక్టర్‌ యం.రామకృష్ణ తెలిపారు.