- అధికారుల డైరీ ఆవిష్కరణలో మంత్రి నిరంజన్‌రెడ్డి
నవతెలంగాణబ్యూరో-హైదరాబాద్‌
వ్యవసాయ శాఖలో నెలకొన్న ఉద్యోగుల సమస్యలంటినీ పరిష్కరిస్తామని రాష్ట్ర వ్యవసాయ శాఖ మంత్రి సింగిరెడ్డి నిరంజన్‌రెడ్డి అన్నారు. త్వరలోనే పదోన్నతులు చేపడతామని వెల్లడించారు. అదనపు పోస్టుల మంజూరు కోసం సీఎం కేసీఆర్‌ హామీ ఇచ్చారని గుర్తు చేశారు. ఉద్యోగ సంఘాలు ఒక్క తాటి మీదకు రావాలని సూచించారు. గురువారం హైదరాబాద్‌లోని అబిడ్స్‌ రెడ్డి హాస్టల్‌ ఆడిటోరియంలో తెలంగాణ వ్యవసాయ అధికారుల సంఘం నూతన సంవత్సర డైరీ, క్యాలెండర్లను మంత్రి ఆవిష్కరించారు. తెలంగాణలో అత్యధిక మంది ప్రజలకు సేవలందిస్తున్నది కూడా వ్యవసాయ శాఖేనని చెప్పారు. దానికి ప్రజలతో ప్రత్యేక అనుబంధం ఉందన్నారు. ఈ కార్యక్రమంలో వ్యవసాయ శాఖ కార్యదర్శి రఘునందన్‌రావు, సంఘం చైర్మెన్‌ బి.కృపాకర్‌రెడ్డి, వైస్‌చైర్మెన్‌ సత్యనారాయణ, ప్రధాన కార్యదర్శి జి.కృపాకర్‌రెడ్డి తదితరులు పాల్గొన్నారు.