- పలుచోట్ల ఉరుములు, మెరుపులతో కూడిన వర్షం!
- పలు జిల్లాల్లో ఉష్ణోగ్రతలు తగ్గే అవకాశం
నవతెలంగాణ బ్యూరో-హైదరాబాద్‌
రాష్ట్రంలో వచ్చే నాలుగు రోజులు తేలికపాటి నుంచి మోస్తరు వర్షాలు కురిసే అవకాశం ఉందని హైదరాబాద్‌ వాతారవణ కేంద్రం ప్రధాన అధికారి కె.నాగరత్న తెలిపారు. 23, 24 తేదీల్లో ఉరుములు, మెరుపులతో కూడిన వర్షాలు రాష్ట్రంలో పలుచోట్ల పడే అవకాశం ఉందని పేర్కొన్నారు. రాష్ట్రంమీదుగా వాయువ్య దిశ నుంచి కిందిస్థాయి గాలులు వీస్తున్నాయి. ఫలితంగా కనిష్ట ఉష్ణోగ్రతలు మళ్లీ తగ్గుతున్నాయి. నిర్మల్‌ జిల్లా ఠానూర్‌లో అత్యల్పంగా 10.9 డిగ్రీల కనిష్ట ఉష్ణోగ్రత నమోదైంది. ఆదిలాబాద్‌, కొమ్రంభీమ్‌ అసిఫాబాద్‌, నిర్మల్‌, మంచిర్యాల జిల్లాల్లో 23,24,25 తేదీల్లో కనిష్ట ఉష్ణోగ్రతలు పది డిగ్రీల నుంచి ఐదు డిగ్రీల మధ్య నమోదయ్యే అవకాశం ఉందని వాతావరణ కేంద్రం ప్రకటించింది. అందువల్ల ఆయా జిల్లాల ప్రజలు జాగ్రత్తలు తీసుకోవాలని సూచించింది. 24,25 తేదీల్లో కరీంనగర్‌, మెదక్‌, సంగారెడ్డి, వికారాబాద్‌, రాజన్నసిరిసిల్ల జిల్లాల్లో రాత్రి ఉష్ణోగ్రతలు తగ్గే అవకాశం ఉంది.