- రాజ్యాంగ ఫెడరల్‌ స్ఫూర్తికి విరుద్ధం : ప్రధానికి సీఎం కేసీఆర్‌ లేఖ
నవతెలంగాణ బ్యూరో - హైదరాబాద్‌
కేంద్రం చేపట్టిన ఆల్‌ ఇండియా సర్వీసెస్‌ (క్యాడర్‌) రూల్స్‌ 1954 ప్రతిపాదిత సవరణలు ఏ రకంగా చూసి నా రాజ్యాంగ ఫెడరల్‌ స్ఫూర్తికి విరుద్ధంగా ఉందని సీఎం కేసీఆర్‌ తీవ్ర నిరసన వ్యక్తం చేశారు. ఈ మేరకు సోమవారం ఆయన ప్రధానమంత్రి నరేంద్రమోడీకి లేఖ రాశారు. '' ఈ సవరణలు ఐఏఎస్‌, ఐపీఎస్‌ మరియు ఐఎఫ్‌ఎస్‌ల పనితీరును, వారి ఉద్యోగ స్వరూపాన్ని పూర్తి గా మార్చివేసే విధంగా ఉన్నాయి. రాష్ట్ర ప్రభుత్వం ఈ సవరణలను పూర్తిగా వ్యతిరేకిస్తున్నది. ఆయా రాష్ట్రాల్లో ఏఐఎస్‌ అధికారులు నిర్వర్తించే క్లిష్టమైన ప్రత్యేక బాధ్యతల దృష్ట్యా రాష్ట్ర ప్రభుత్వాల అనుమతి లేనిదే బదిలీపై కేంద్రం తీసుకోవడం ద్వారా రాష్ట్రాల పరిపాల నలపై తీవ్ర ప్రభావం చూపుతుంది. ఇది రాజ్యాంగ స్వరూపానికి, సహకార సమాఖ్య స్ఫూర్తికి గొడ్డలిపెట్టు. ఈ సవరణల ద్వారా రాష్ట్రాలు గుర్తింపు లేకుండాపోయి నామమాత్రపు వ్యవస్థలుగానే మిగిలిపోయే ప్రమాదం ఉన్నదని'' విమర్శించారు. ''ఈ ప్రతిపాదిత సవరణలు రాష్ట్రాల్లో పనిచేసే అధికారులపై పరోక్ష నియంత్రణను అమలుచేసే ఎత్తుగడ. కేంద్ర ప్రభుత్వ అధికారులను తన చెప్పుచేతల్లో ఉంచుకునేందుకే ఈ సవరణ. ఇది రాష్ట్ర ప్రభుత్వాల పరిపాలనలో కేంద్రం తలదూర్చడమే అవుతుంది. రాష్ట్ర ప్రభుత్వాల పాలనలో ఏఐఎస్‌ అధికారులను బాధ్యులుగా, జవాబుదారులుగా చేయాల్సిందిపోయి..వారిని మరింత నిరుత్సాహానికి గురిచేయడం, కేంద్రం చేత వేధింపుల దిశగా ఈ సవరణ ఉసిగొల్పుతుంది. ఈ విధానం ఏఐఎస్‌ అధికారుల ముందు రాష్ట్రాలను నిస్సహాయులుగా నిలబెడుతుంది. రాజ్యాంగంలోని ఆర్టికల్‌ 312లోని నిబంధనల ప్రకారం ఆల్‌ ఇండియా సర్వీసెస్‌ 1951 చట్టాన్ని పార్లమెంటు చేసిందనీ, దాని ప్రకారం భారత ప్రభుత్వం పలు నిబంధనలను రూపొందించిందని నేను అంగీకరిస్తున్నాను. కానీ, రాష్ట్రాల ఆకాంక్షలను కాలరాసే విధంగా దేశ సమాఖ్య రాజనీతిని పలుచన చేసే దిశగా ఏఐఎస్‌ క్యాడర్‌ రూల్స్‌ (1954)కు రంగులద్దుతూ ఉద్దేశపూర్వకంగా చేసిన సవరణను '' సీఎం తీవ్రంగా వ్యతిరేకించారు. ''ఈ సవరణ కేంద్ర, రాష్ట్ర సంబంధాలకు సంబంధించి భారత రాజ్యాంగాన్ని సవరించ డమే తప్ప మరోటి కాదు. ఏఐఎస్‌ సవరణను ఇట్లా దొడ్డిదారిన కాకుండా కేంద్ర ప్రభుత్వానికి ధైర్యముంటే పార్లమెంటు ప్రక్రియ ద్వారా సవరించాలి. రాష్ట్రాల ఆకాంక్షలకు విఘాతం కలుగకుండా ఉండాలంటే, రాష్ట్రాల అభిప్రాయాలను కూడా పరిగణలోకి తీసుకొన్న తర్వాతే రాజ్యాంగ సవరణలు చేపట్టాలనే నిబంధనను ఆర్టికల్‌ 368 (2)లో రాజ్యాంగ నిర్మాతలు ఎంతో దూరదృష్టితో పొందుపరిచారు. ఈ సవరణ కేంద్ర, రాష్ట్రాల మధ్య ఉండే పరి పాలన పరమైన ఏఐఎస్‌ ఉద్యోగుల పరస్పర సర్దుబాటుకు గొడ్డలి పెట్టు. ఈ సవరణ ప్రతిపాదనలు కేంద్ర, రాష్ట్ర ప్రభుత్వాల మధ్య సంబంధాలకు మరింత విఘాతం. ఏఐఎస్‌ అధికారులను రాష్ట్రా ల్లో సామరస్యతతో, చక్కని సమతుల్యతతో వినియోగించు కోవడానికి ప్రస్తుతం అమలులో ఉన్న ఏఐఎస్‌ క్యాడర్‌ రూల్స్‌ సరిపోతాయి. ఈనేపథ్యంలో పరిపాలనా పరమైన పారదర్శకతను, రాజ్యాంగ సమాఖ్య రాజనీతిని కొనసాగేంచాలనీ, అందుకు ప్రస్తుతం కేంద్రం చేపట్టిన ప్రతిపాదిత సవరణలను నిలిపివేయా లని'' సీఎం కేసీఆర్‌ కేంద్ర ప్రభుత్వాన్ని డిమాండ్‌ చేశారు.