నవతెలంగాణ బ్యూరో-హైదరాబాద్‌
ప్రాథమిక, ప్రాథమికోన్నత ఉపాధ్యాయులు పాఠశాలలకు హాజరుకావాలని మౌఖికంగా ఆదేశించడం సమంజసం కాదని తెలంగాణ రాష్ట్ర ప్రైమరీ టీచర్స్‌ అసోసియేషన్‌(టీఎస్‌పీటీఏ) రాష్ట్ర అధ్యక్ష, ప్రధాన కార్యదర్శులు సయ్యద్‌షౌకత్‌ అలీ, నాగనమోని చెన్నరాములు బుధవారం ఒక ప్రకటనలో తెలిపారు. అలా చేయడమంటే రాష్ట్ర ప్రభుత్వ ప్రధాన కార్యదర్శి ఆదేశాలను ధిక్కరించడమే అవుతుందని పేర్కొన్నారు. కోవిడ్‌ వ్యాప్తి ఉధృతంగా ఉన్న నేపథ్యంలో పాఠశాలలకు ఈనెల 30వరకు సెలవులు ప్రకటించి ఉపాధ్యాయులను రావాలని అధికారులు ఆదేశించడమేమిటని ప్రశ్నించారు. మౌఖికంగా కాకుండా రాతపూర్వకంగా ఆదేశాలను జారీ చేస్తే హాజరవుతామని తెలిపారు.