- కేంద్ర ఆర్థిక మంత్రికి కేటీఆర్‌ లేఖ
నవతెలంగాణ బ్యూరో - హైదరాబాద్‌
జాతీయ పట్టణ ఉపాధిహామీ పథకాన్ని ప్రవేశపెట్టాలని రాష్ట్ర పురపాలక, పట్టణాభివృద్ధి శాఖ మంత్రి కేటీఆర్‌ కేంద్రాన్ని కోరారు. కేంద్ర బడ్జెట్‌ ప్రవేశపెట్టనున్న నేపథ్యంలో పలు సూచనలు చేస్తూ గురువారం ఆయన కేంద్ర ఆర్థికశాఖ మంత్రి నిర్మలా సీతారామన్‌కు లేఖ రాశారు. దేశంలోని పట్టణ ప్రాంత పేద ప్రజల కోసం జాతీయ గ్రామీణ ఉపాధి హామీ పథకం మాదిరిగా ఒక ప్రత్యేక ఉపాధి హామీ కార్యక్రమాన్ని ప్రవేశపెట్టాల్సిన అవసరం ఉందని తెలిపారు. ఈ విషయాన్ని రానున్న బడ్జెట్‌ సమావేశాల్లో పరిశీలించాలని ఆయన సూచించారు. 2011 జనాభా లెక్కల ప్రకారం దేశంలోని 31శాతం జనాభా పట్టణాల్లో నివాసం ఉందనీ, ఇది 2030 నాటికి 40 శాతానికి చేరుకుంటుందని చెప్పారు. తెలంగాణ లాంటి వేగంగా అభివృద్ధి చెందు తున్న రాష్ట్రాల్లో ఇది 50 శాతాన్ని దాటే అవకాశం ఉందని పేర్కొన్నారు. పట్టణ పేదలకు అవసరమైన గృహాలు, తాగునీటి సరఫరా, పారిశుద్ధ్యం, ఆరోగ్యం, విద్య, సామాజిక భద్రత, జీవనోపాధి వంటి అంశాల పైన ప్రత్యేక కార్యక్రమాలను చేపట్టాల్సిన అవసరం ఉందని తెలిపారు. పట్టణ పేదలు అత్యధిక శాతం అసంఘటిత రంగంలో కార్మికులుగా, చిరు వ్యాపారులుగా, కూలీలుగా పని చేస్తున్న పరిస్థితి ఉందని పేర్కొన్నారు. ఒక్కరోజు ఉపాధి దొరకకుండా ఉంటే .... వారి జీవన స్థితిగతులు తారుమారయ్యే దయనీయమైన పరిస్థితి నెలకొందని ఆవేదన వ్యక్తం చేశారు. సెంటర్‌ ఫర్‌ మానిటరింగ్‌ ఇండియన్‌ ఎకానమీ లెక్కల ప్రకారం 2019 అక్టోబర్‌ నుంచి 2021 మార్చి మధ్యలో గరిష్టంగా 21 శాతం నిరుద్యోగం పెరిగిందని ఆందోళన వ్యక్తం చేశారు. ఇప్పటికే ప్రభుత్వం నియమించిన పలు కమిటీలు, దేశంలోని వివిధ సంస్థలు పట్టణ పేదల కోసం ప్రత్యేకంగా ఒక ఉపాధిహామీ కార్యక్రమాన్ని ప్రవేశ పెట్టాల్సిన అవసరాన్ని మంత్రి కేటీఆర్‌ తన లేఖలో ప్రస్తావించారు. గతంలో పార్లమెంట్‌ సభ్యుడు భర్తహరి మహతాబ్‌ ఆధ్వర్యంలో ఏర్పాటైన పార్లమెంటరీ స్టాండింగ్‌ కమిటీ, సీఐఐ లాంటి సంస్థలు పట్టణ ప్రాంతాల్లోని ప్రజల సామాజిక భద్రతను పెంచేందుకు పట్టణ ఉపాధిహామీ కార్యక్రమాన్ని చేపట్టాలని సూచించిన విషయాన్ని మంత్రి కేటీఆర్‌ ఉటంకించారు. పట్టణ ప్రాంతాల వైపు భారీగా వలస వస్తున్న గ్రామీణ పేదల కోసం పట్టణాల్లో మరిన్ని ఉపాధి అవకాశాలు పెరగాల్సిన అవసరం ఉందని కేటీఆర్‌ తెలిపారు. జాతీయస్థాయిలో అసంఘటిత రంగంలో భారీ ఎత్తున ఉపాధి అవకాశాలు కల్పించేందుకు అవకాశం కేవలం పట్టణాలకే ఉన్నదని, అయితే ఈ అసంఘటిత రంగంలో పేదలు పని చేసేందుకు వీలు కల్పించేలా వారికి నైపుణ్య అభివృద్ధి, , సామాజిక భద్రత, కార్మిక సంక్షేమం వంటి అనేక చర్యలను ఈ ప్రత్యేక ఉపాధి హామీ కార్యక్రమంలో భాగంగా చేర్చాలని సూచించారు. లాక్‌డౌన్‌ సమయంలో దేశం చూసిన పట్టణ పేద ప్రజల వలస సంఘటనలు భవిష్య త్తులో పునరావృతం కాకుండా చూడాలంటే, పట్టణ అసంఘటిత రంగాన్ని మరింత బలోపేతం చేయడం మాత్రమే మార్గమని కేటీఆర్‌ అభిప్రాయ పడ్డారు పట్టణాల్లో చేపట్టే ఫుట్‌పాత్‌ లు, డ్రైనేజీల నిర్మాణం వంటి ప్రాథమిక మౌలిక వసతుల నిర్వహణ వంటి కార్యక్రమాల్లో పట్టణ పేద ప్రజలకు భాగస్వామ్యం కల్పిస్తూ వారి ఉపాధికి హామీ ఇచ్చే విధంగా కార్యాచరణ రూపొందించుకునే అవకాశం ఉందని ఆ లేఖలో కేటీఆర్‌ విజ్ఞప్తి చేశారు.