నవతెలంగాణ - హుజూరాబాద్‌
కరీంనగర్‌ జిల్లా హుజూరాబాద్‌ ఆర్టీసీ డిపోకు చెందిన డ్రైవర్‌ జి.రాజయ్య శుక్రవారం పురుగుల మందు తాగి ఆత్మహత్యాయత్నం చేశాడు. వివరాల్లోకి వెళితే.. ఇటీవల డ్రైవర్‌ రాజయ్య డ్యూటీలో ఉన్నప్పుడు బస్సు యాక్సిడెంట్‌ జరిగింది. దాంతో అతడికి డిపోలో డ్యూటీ ఇచ్చారు. ఈ క్రమంలో మనస్తాపంతో శుక్రవారం తెల్లవారుజామున పురుగుల మందు తాగాడు. డిపోలో పడి ఉన్న ఆయనను తోటి ఉద్యోగులు చూసి వెంటనే హుజూరాబాద్‌ ఏరియా ప్రభుత్వ ఆస్పత్రికి తరలించారు. ప్రథమ చికిత్స అనంతరం వరంగల్‌ ఎంజీఎంకు పంపించారు. అధికారుల తీరు వల్లే మనస్తాపానికి గురై ఆత్మహత్యాయత్నం చేసినట్టు తోటి కార్మికులు ఆరోపిస్తున్నారు. అతడిని ఎవరూ ఇబ్బంది పెట్టలేదని డీఎం రజనీకృష్ణ తెలిపారు.