నవతెలంగాణ-హవేళిఘనపూర్‌
ఓ పక్క బోర్లు వేసి అప్పుల పాలవడం.. మరోపక్క భార్య ఆరోగ్య పరిస్థితి బాగలేకపోవడంతో మనస్తాపానికి గురై ఓ వ్యక్తి ఆత్మహత్య చేసుకున్నాడు. ఆలస్యంగా వెలుగులోకి వచ్చిన ఈ ఘటన మెదక్ జిల్లా హవేలీ ఘనపూర్‌లో జరిగింది. హవేలీ ఘనపూర్‌ ఎస్‌ఐ సంతోష్‌ కుమార్‌ తెలిపిన వివరాల ప్రకారం.. బి.తిమ్మాయిపల్లి గ్రామానికి చెందిన ఆముదాల వెంకటి (48) భార్య కొన్ని రోజులుగా అనారోగ్యంతో బాధపడుతున్నది. కాగా గ్రామ శివారులో ఉన్న 51 సర్వే నెంబర్‌ భూమిలో అప్పులు తెచ్చి నాలుగు బోర్లు వేసినా నీళ్లు పడలేదు. అటు భార్య ఆరోగ్యం బాగా లేక, ఇటు బోర్ల కోసం తెచ్చిన అప్పులు.. ఆర్థికంగా కుంగదీశాయి. దాంతో వాటిని ఎలా తీర్చాలోనన్న తీవ్ర మనస్తాపానికి గురైన వెంకటి గురువారం ఉరేసుకుని ఆత్మహత్య చేసుకున్నాడు. మృతుని కుమారుని ఫిర్యాదు మేరకు కేసు నమోదు చేసి దర్యాప్తు చేస్తున్నట్టు ఎస్‌ఐ తెలిపారు.
