- ఆవాజ్‌ రాష్ట్ర కార్యదర్శి మహమ్మద్‌ అబ్బాస్‌
నవతెలంగాణ బ్యూరో-హైదరాబాద్
మతోన్మాదంపై పోరాటంలో గాంధీ తన ప్రాణాన్ని కోల్పోయారనీ, ఆయనను స్ఫూర్తిగా తీసుకుని మతోన్మాదంపై పోరాడాలని, దేశంలో లౌకిక, ప్రజాస్వామిక విలువలను కాపాడుకోవాలని ఆవాజ్‌ రాష్ట్ర ప్రధాన కార్యదర్శి మహమ్మద్‌ అబ్బాస్‌ పిలుపునిచ్చారు. ఆదివారం హైదరాబాద్‌లోని సుందరయ్య విజ్ఞాన కేంద్రంలో గాంధీ వర్థంతిని ఆవాజ్‌ ఆధ్వర్యంలో నిర్వహించారు. ఈ సందర్భంగా అబ్బాస్‌ మాట్లాడుతూ. దేశ ప్రజలు మతసామరస్యం, లౌకికవాదం, శాంతియుత సహజీవనంతో కలిసిమెలిసి జీవించాలని ఆకాంక్షించిన మహనీయుడు గాంధీ అని కొనియాడారు. దానిని సహించలేని సంఫ్‌ు పరివార్‌, మతోన్మాద శక్తులు ఆయనను దారుణంగా హత్య చేశాయని తెలిపారు. దేశంలో నేడు మతోన్మాద శక్తులు బలం పుంజుకుని ప్రశ్నించిన వారిని వ్యక్తిగతంగా హత్య చేయడం ద్వారా భయబ్రాంతులకు గురి చేయాలని చూస్తున్నాయన్నారు. గోవింద్‌ పన్సారే దబోల్కర్‌, కల్బుర్గి, గౌరీ లంకేష్‌ లాంటి హేతువాదులను దారుణంగా హత్యచేసిన క్రమాన్ని వివరించారు. శాస్త్రీయ, హేతుబద్ద ఆలోచనలు రాకుండా ప్రజలను మత మౌఢ్యంలో ఉంచాలని మతోన్మాద శక్తులు కుట్ర చేస్తున్నాయని విమర్శించారు. రాజ్యాంగం ప్రజలకిచ్చిన హక్కులను మతం, సంప్రదాయాల పేరుతో బలవంతంగా అణిచి వేయడానికి ప్రయత్నం చేస్తున్నాయని తెలిపారు. మతరాజ్యస్థాపన దిశగా బీజేపీ వెళ్తున్నదని విమర్శించారు. ఓవైపు దేశ సంపద, ప్రభుత్వ రంగ సంస్థలను కార్పొరేట్‌ సంస్థలకు కట్టబెడుతూ మరోవైపు దేశభక్తి, దైవభక్తి పేరుతో ప్రజలను మభ్యపెడుతున్న తీరును వివరించారు. దేశంలో మతోన్మాద శక్తులను ఎదిరించడానికి గాంధీజీ స్ఫూర్తితో ఉద్యమాలు చేపట్టాలని పిలుపునిచ్చారు. ఈ కార్యక్రమానికి ఆవాజ్‌ రాష్ట్ర ఉపాధ్యక్షులు అజీజ్‌ అహమ్మద్‌ ఖాన్‌ అధ్యక్షత వహించారు. గాంధీజీ చిత్రపటానికి 'పట్నం' రాష్ట్ర ప్రధాన కార్యదర్శి డీజీ నరసింహారావు పూలమాల వేసి నివాళులు అర్పించారు. కార్యక్రమంలో తెలంగాణ రాష్ట్ర సాంస్కృతిక కేంద్రం కన్వీనర్‌ జి రాములు, హిమబిందు, ఆవాజ్‌ రాష్ట్ర కోశాధికారి షేక్‌ అబ్దుల్‌ సత్తార్‌ ప్రసంగించారు. ఆవాజ్‌ నాయకులు యాకూబ్‌, ఇబ్రహీం, అంజుమ్‌, సుల్తానా, అలీ, ఖాజా గరీబ్‌ తదితరులు పాల్గొన్నారు.
