నవతెలంగాణ బ్యూరో - హైదరాబాద్
పద్మశ్రీ అవార్డు గ్రహీత, డోలువాయిద్యంలో ప్రత్యేక ప్రతిభను కనబరిచిన కళాకారుడు సకిని రామచంద్రయ్యకు ఆయన సొంత జిల్లా కేంద్రం కొత్తగూడెంలో నివాసయోగ్యమైన ఇంటిస్థలం, నిర్మాణ ఖర్చుకు రూ.ఒక కోటి రూపాయల రివార్డును ముఖ్యమంత్రి కె.చంద్రశేఖర్‌ రావు ప్రకటించారు. పద్మశ్రీ అవార్డును అందుకున్న నేపథ్యంలో సీఎం కేసీఆర్‌ను మంగళవారం ప్రగతి భవన్‌లో మర్యాదపూర్వకంగా రామచంద్రయ్య కలిశారు. అంతరించిపోతున్న ఆదివాసీ సాంస్కృతక కళను బతికిస్తున్నందుకు సీఎం ఆయన్ని అభినందించారు. తన జీవితకాలపు ప్రతిభకు గుర్తింపుగా ప్రతిష్టాత్మక పద్మశ్రీ అవార్డు ను పొందడం పట్ల కేసీఆర్‌ శుభాకాంక్షలు తెలిపారు.
ఈ సందర్భంగా రామచంద్రయ్య యోగ క్షేమాలను ముఖ్యమంత్రి అడిగి తెలుసుకున్నారు.
పద్మశ్రీ కనక రాజుకు రివార్డు ప్రకటించిన సీఎం కేసీఆర్‌
గత సంవత్సరం పద్మశ్రీ అవార్డు అందుకున్న గుస్సాడీ నృత్య కళాకారుడు కనకరాజుకు ఆయన సొంత జిల్లా కేంద్రంలో నివాసయోగ్యమైన ఇంటి స్థలాన్ని, నిర్మాణ ఖర్చుల కోసం రూ.ఒక కోటి రూపాయలను సీఎం కేసీఆర్‌ ప్రకటించారు. ఇందుకు సంబంధించి సమన్వయం చేసుకోవాల్సిందిగా ఆసిఫాబాద్‌ ఎమ్మెల్యే ఆత్రం సక్కును ఆదేశించారు.
