నవతెలంగాణ బ్యూరో-హైదరాబాద్‌
కేంద్ర బడ్జెట్‌ పేదలను విస్మరించిందనీ, ముఖ్యంగా కార్పొరేట్ల ప్రయోజనాలకు కొమ్ముకాసిందని అఖిలభారత ప్రజాతంత్ర మహిళా సంఘం (ఐద్వా) రాష్ట్ర అధ్యక్ష, ప్రధాన కార్యదర్శులు ఆర్‌ అరుణజ్యోతి, మల్లు లక్ష్మి బుధవారం ఒక ప్రకటనలో తెలిపారు. మహిళల అభ్యున్నతికి ఈ బడ్జెట్‌ ఏ మాత్రం ఉపకరించదని పేర్కొన్నారు. బాలికలకు విద్య అందుబాటులో లేకుండా పోయిందనీ, డిజిటల్‌ విద్యద్వారా మహిళలు విద్యావకాశాలను మరింతగా కోల్పోతారని తెలిపారు. మౌలిక సదుపాయాల ప్రయివేటీకరణ వలన మహిళలపై మరింత భారం పెరుగుతున్నదని పేర్కొన్నారు. ఆహారం, ప్రజాపంపిణీ, గ్రామీణాభివృద్దికి తగిన విధంగా కేటాయింపులు లేవని ఆందోళన వ్యక్తం చేశారు. మహిళల పై సాగుతున్న అత్యాచార నిరోధకానికి అవసరమైన కోర్టుల ఏర్పాటు,నిర్భయ నిధి పెంపుదల గురించి ప్రస్తావించలేదని పేర్కొన్నారు.