నవతెలంగాణ-కోహెడ
ఓ పక్క పంట దిగుబడి లేక ఆర్థిక సమస్యలు, మరోపక్క పిల్లల చదువుల ఖర్చులు పెరగడంతో దిక్కుతోచని స్థితిలో రైతు ఆత్మహత్య చేసుకున్నాడు. ఈ ఘటన సిద్దిపేట జిల్లా కోహెడ మండలంలోని శనిగరం గ్రామంలో శుక్రవారం రాత్రి జరిగింది. పోలీసులు తెలిపిన వివరాల ప్రకారం..ఆకుల రవీందర్‌(45) రెండెకరాల భూమిలో వ్యవసాయం చేస్తూ కుటుంబాన్ని పోషిస్తున్నాడు. అయితే, పంట దిగుబడి సరిగా రాలేదు. ఆర్థిక సమస్యలు చుట్టుముట్టాయి. దీనికితోడు పిల్లల చదువులు ఖర్చులు పెరిగాయి. ఈ క్రమంలో తీవ్ర మనస్తాపానికి గురైన రవీందర్‌ పురుగుల మందు తాగి ఆత్మహత్య చేసుకున్నాడు. రైతు భార్య ఆకుల లత ఫిర్యాదు మేరకు కేసు దర్యాప్తు చేస్తున్నట్టు ఏఎస్‌ఐ పవన్‌కుమార్‌ తెలిపారు.