- అప్పుల బాధతో రైతు ఆత్మహత్య
నవతెలంగాణ-కౌడిపల్లి
అప్పులు తెచ్చి బోర్లు వేస్తే చుక్క నీరు పడలేదు.. మరోపక్క ఆశించిన పంట దిగుబడి రాలేదు.. దాంతో తీవ్ర మనస్తాపం చెందిన ఓ రైతు ఆత్మహత్య చేసుకున్నాడు. ఈ ఘటన మెదక్‌ జిల్లా కౌడిపల్లి మండలం మహమ్మద్‌ నగర్‌లో జరిగింది. ఏఎస్‌ఐ కిష్టయ్య తెలిపిన వివరాల ప్రకారం.. గ్రామానికి చెందిన రాములు(45)కు మహబూబ్‌నగర్‌ శివారులో 26 గుంటల భూమి ఉంది. ఆ భూమిలో రెండు బోర్లు వేయగా నీరు పడలేదు. దీనికి తోడు ఆశించిన పంట దిగుబడి రాలేదు. ఇటు బోర్లు, అటు పంట పెట్టుబడి కోసం రూ.2,40,000 అప్పులయ్యాయి. ఎలా తీర్చాలో తెలియక తీవ్ర మనస్తాపానికి గురై మహమ్మద్‌ నగర్‌ పెద్ద చెరువు కట్ట వద్ద ఓ చెట్టుకు ఉరేసుకుని ఆత్మహత్య చేసుకున్నాడు. సమాచారం అందుకున్న పోలీసులు.. ఘటనాస్ధలికి చేరుకొని మృతదేహాన్ని పోస్టుమార్టం నిమిత్తం ఏరియాస్పత్రికి తరలించారు. మృతుడి భార్య అంతారం లక్ష్మి ఫిర్యాదు మేరకు కేసు నమోదు చేసినట్టు ఏఎస్‌ఐ తెలిపారు.