నవతెలంగాణ బ్యూరో-హైదరాబాద్‌
దేశవ్యాప్తంగా కేంద్ర ప్రభుత్వం చేపట్టే జనాభా లెక్కల్లో భాగంగా బీసీ కులాలను లెక్కించాలని తెలంగాణ బీసీ సంక్షేమ సంఘం రాష్ట్ర అధ్యక్షులు మేకపోతుల నరేందర్‌గౌడ్‌ డిమాండ్‌ చేశారు. గురువారం ఆ సంఘం రాష్ట్ర కమిటీ సమావేశంలో ఆయన మాట్లాడుతూ బీసీ కులగణన చేయకపోతే బీజేపీకి బీసీల చేతిలో రాజకీయ సమాధి తప్పదని హెచ్చరించారు. ఆయా తరగతులను అడ్డంపెట్టుకుని ప్రధానమంత్రి పదవిని అనుభవిస్తున్న నరేంద్రమోడీ వెంటనే బీసీల కులగణన చేపట్టాలని కోరారు. ఈ సమస్య సాధనకు దేశవ్యాప్తంగా నిరసన కార్యక్రమాలు చేపడతామని ప్రకటించారు. మార్చి 21న ఢిల్లీలోని జంతర్‌మంతర్‌ వద్ద భారీ నిరసన కార్యక్రమం నిర్వహిస్తున్నట్టు వివరించారు. అదే సందర్భంగా పార్లమెంటును ముట్టడిస్తామని ప్రకటించారు. మార్చి 22, 23 తేదీల్లో బీసీ కులగణన అవసరాన్ని బీజేపీయేతర ప్రతిపక్షాలకు వివరిస్తామని చెప్పారు. ఈ సమావేశంలో ఆ సంఘం రాష్ట్ర నాయకులు పల్లె ఉపేందర్‌గౌడ్‌, బొల్లం లింగమూర్తి, శ్రీనివాస్‌, సూర్యనారాయణ, సిరవేణి స్వప్న తదితరులు పాల్గొన్నారు.