- మాజీ ప్రధాని దేవెగౌడ
నవతెలంగాణ బ్యూరో-హైదరాబాద్
కేంద్రంలోని బీజేపీ ప్రభుత్వం అనుసరిస్తున్న మతతత్వ విభజన రాజకీయాలకు వ్యతిరేకంగా పోరాడుతున్న ముఖ్యమంత్రి కె.చంద్రశేఖర్‌ రావుకు సర్వత్రా మద్ధతు లభిస్తున్నది. ఈ మేరకు, మాజీ ప్రధాని, జనతాదళ్‌ (సెక్యులర్‌) జాతీయ అధ్యక్షుడు హెచ్‌.డి. దేవెగౌడ సీఎం కేసీఆర్‌ చేస్తున్న పోరాటానికి తన సంపూర్ణ మద్దతును ప్రకటించారు. దేశంలో మత తత్వానికి వ్యతిరేకంగా పోరాడుతున్నందుకు కేసీఆర్‌ను ఆయన అభినందించారు. ఈమేరకు మంగళవారం సీఎంకు దేవెగౌడ ఫోన్‌ చేశారు. ఈ సందర్భంగా ఆయన మాట్లాడుతూ '' రావు సాబ్‌...మీరు అద్భుతంగా పోరాడుతున్నారు. మత తత్వ శక్తుల మీద ఎవరమైనా పోరాటాన్ని కొనసాగించాల్సిందే. దేశ లౌకికవాద సంస్కృతిని, దేశాన్ని కాపాడుకునేందుకు మీమందరం మీకు అండగా వుంటాం... మీ యుద్దాన్ని కొనసాగించండి.. మా సంపూర్ణమద్దతు మీకు ఉంటుంది.'' అంటూ దేవగౌడ తన మద్దతును ప్రకటించారు. కాగా ...తాను త్వరలోనే బెంగళూరుకు వచ్చి సమావేశమవుతానని ఈ సందర్భంగా సీఎం కేసీఆర్‌, దేవెగౌడకు తెలిపారు. ఈ మేరకు తెలంగాణ సీఎంఓ ఒ ప్రకటన విడుదల చేశారు.
