- మంత్రి హరీశ్‌ రావు అభినందనలు
నవతెలంగాణ బ్యూరో - హైదరాబాద్‌
             సహజ ప్రసవాల విషయంలో కొండాపూర్‌ జిల్లా ఆస్పత్రి, ఖమ్మం మాతా, శిశు ఆస్పత్రి మెరుగైన పనితీరును కనబరిచాయని రాష్ట్ర వైద్యారోగ్యశాఖ మంత్రి టి.హరీశ్‌ రావు అభినందించారు. ఈ మేరకు బుధవారం ఆయన ట్వీట్‌ చేశారు. కొండాపూర్‌ ఆస్పత్రిలో గతంలో నెలకు 20 కాన్పులు చేసేవారనీ, ప్రస్తుతం నెలకు 230 చేస్తున్నారని తెలిపారు. అందులోనూ గత నాలుగు నెలల్లో 990 కాన్పులు జరిగితే అందులో 559 సహజ ప్రసవాలని వెల్లడించారు. సి-సెక్షన్‌ ఆపరేషన్లను 45 శాతం నుంచి 30 శాతానికి తగ్గించిన కొండాపూర్‌ ఆస్పత్రి సూపరింటెండెంట్‌ వరదాచారిని, వైద్య సిబ్బందిని ప్రశంసించారు. ఖమ్మం జిల్లా కేంద్రంలోని మాతా, శిశు సంరక్షణ కేంద్రంలో ఏప్రిల్‌ 599 ప్రసవాలు జరిగితే అందులో 359 (61 శాతం) సహజ ప్రసవాలను మంత్రి తెలిపారు. సహజ ప్రసవాలను 40 శాతం నుంచి 61 శాతానికి పెంచేందుకు కృషి చేసిన జిల్లా కలెక్టర్‌, వైద్య సిబ్బందికి అభినందనలు తెలిపారు. ఇదే స్ఫూర్తితో సి-సెక్షన్‌ ఆపరేషన్లను మరింతగా తగ్గించాలని ఆయన సూచించారు.