- ఐసీడీఎస్‌ కమిషనర్‌కు యూనియన్‌ వినతి
- సానుకూల స్పందన
నవతెలంగాణ-హైదరాబాద్‌బ్యూరో
రాష్ట్రంలోని మినీ అంగన్‌వాడీ వర్కర్ల సమస్యల్ని పరిష్కరించాలని కోరుతూ తెలంగాణ అంగన్‌వాడీ టీచర్స్‌ అండ్‌ హెల్పర్స్‌ యూనియన్‌ (సీఐటీయూ) రాష్ట్ర కమిటీ ఐసీడీఎస్‌ కమిషనర్‌ దివ్యకు వినతిపత్రం సమర్పించింది. దీనికి కమిషనర్‌ సానుకూలంగా స్పందించినట్టు యూనియన్‌ ప్రతినిధులు తెలిపారు. గురువారం యూనియన్‌ ప్రధాన కార్యదర్శి పి జయలక్ష్మి, సహాయ కార్యదర్శులు జీ పద్మ, జీ కవితతోపాటు వివిధ జిల్లాలకు చెందిన ప్రతినిధులు కమిషనర్‌తో సమస్యలపై చర్చించారు. ఈ సందర్భంగా కమిషనర్‌ స్పందిస్తూ వేతనాలు పెంచే విధంగా ప్రభుత్వానికి ప్రతిపాదనలు పంపామనీ, ఖాళీ పోస్టుల స్థానంలో డైరెక్ట్‌ ప్రమోషన్‌ సౌకర్యం కల్పిస్తామనీ, క్యాజువల్‌ సెలవులు అమలు చేస్తామని హామీ ఇచ్చినట్టు యూనియన్‌ ప్రతినిధులు తెలిపారు. ఇతర డిమాండ్లను కూడా ప్రభుత్వానికి రాతపూర్వకంగా తెలుపుతామని చెప్పారన్నారు.
