- అర్థగణాంక శాఖ ప్రచురణలను ఉపయోగించండి : బోయినపల్లి వినోద్‌కుమార్‌
నవతెలంగాణ బ్యూరో - హైదరాబాద్
ప్రణాళికా, అర్ధగణాంక శాఖలకు చెందిన తెలంగాణ సామాజిక ఆర్థిక ముఖచిత్రం-2022, తెలంగాణ రాష్ట్ర గణాంక సంక్లిష్ట నివేదిక-2022ను తెలుగు అనువాద ప్రచురణలను రాష్ట్ర ప్రణాళికా సంఘం వైస్‌ చైర్మెన్‌ బోయినపల్లి వినోద్‌కుమార్‌ శుక్రవారం హైదరాబాద్‌లో ఆవిష్కరించారు. ఈ సందర్భంగా వినోద్‌కుమార్‌ మాట్లాడుతూ రాష్ట్ర ప్రభుత్వం భర్తీ చేయనున్న ఉద్యోగాల పోటీ పరీక్షల కోసం తెలంగాణ సామాజిక, ఆర్థిక ముఖచిత్రం ప్రచురణ విద్యార్థులకు ఎంతో ఉపయోగపడతాయని చెప్పారు. ఈ ప్రచురణల్లో తెలంగాణ ఆర్థిక పురోగతి అంశాలు, వివిధ రంగాలు, శాఖల అభివృద్ధి, సంక్షేమ పథకాల వివరాలు, గణాంకాలు సమగ్రంగా ఉన్నాయని వివరించారు. వాటితో పోటీ పరీక్షల్లో మెరుగైన ఫలితాలను సాధించి ముందుకు సాగాలని కోరారు. ఖరీదైన ఈ ప్రచురణలు సబ్సిడీతో విద్యార్థులకు ప్రణాళిక శాఖ అందజేస్తుందని అన్నారు. రాష్ట్రంలోని అన్ని జిల్లా కలెక్టర్‌ కార్యాలయాలు, చీఫ్‌ ప్లానింగ్‌ ఆఫీసర్‌ కార్యాలయాలు, గ్రంథాలయాల్లో అందుబాటులో ఉంటాయని చెప్పారు. సాఫ్ట్‌ కాపీలనుwww.telangana.gov.in, www.tsdps.telangana.gov.in, www.ecostat.telangana.gov.in వెబ్‌సైట్‌లలో అందుబాటులో ఉంటాయని సూచించారు. ఈ కార్యక్రమంలో రాష్ట్ర ప్రణాళికా శాఖ డైరెక్టర్‌ షేక్‌ మీరా, ఉప గణాంక అధికారి పి ముకుందరెడ్డి, రాష్ట్ర అర్థగణాంక శాఖ డైరెక్టర్‌ జి దయానంద్‌, తెలంగాణ ఎకనామిక్‌ అసోసియేషన్‌ అధ్యక్షులు డాక్టర్‌ కె ముత్యంరెడ్డి, అర్థగణాంక శాఖ అధికారులు రామకృష్ణ, రామభద్రం, శివకుమార్‌ తదితరులు పాల్గొన్నారు.
