- 16 లక్షల కొలువులు భర్తీ చేయండి
- ఐటీఐఆర్‌ ప్రాజెక్టు రద్దుతో తెలంగాణ యువతకు పెద్ద దెబ్బ
- ఏటా రెండు కోట్ల నియామకాలేవి?
- ఉద్యోగ, ఉపాధి అవకాశాలపై ప్రధాని మోడీకి కేటీఆర్‌ బహిరంగ లేఖ
నవతెలంగాణ బ్యూరో-హైదరాబాద్‌
           ప్రతి ఏటా రెండు కోట్ల ఉద్యోగాలిస్తామన్న హామీ ఏమైందని ప్రధాన మంత్రి నరేంద్రమోడీని టీఆర్‌ఎస్‌ పార్టీ కార్యనిర్వాహక అధ్యక్షులు, మంత్రి కే.తారకరామారావు ప్రశ్నించారు. కేంద్ర ప్రభుత్వ పరిధిలో ఖాళీగా ఉన్న 16 లక్షల ప్రభుత్వ ఉద్యోగాలను వెంటనే భర్తీ చేయాలని డిమాండ్‌ చేశారు. ఈ మేరకు గురువారం ప్రధానికి కేటీఆర్‌ బహిరంగ లేఖ రాశారు. తెలంగాణ రాష్ట్ర ప్రభుత్వం ఇప్పటికే సుమారు లక్షా 32 వేల ప్రభుత్వ ఉద్యోగాలను భర్తీ చేసిందని తెలిపారు. త్వరలో మరో లక్ష పోస్టులను భర్తీ చేయబోతున్నట్టు పేర్కొన్నారు. ప్రయివేటు రంగంలో 16 లక్షల మంది యువతకు ఉపాధి, ఉద్యోగ అవకాశాలను కల్పించామని తెలిపారు. కేంద్రంలోని బీజేపీ సర్కారు ప్రభుత్వ రంగ సంస్థలను అమ్మేయడం ద్వారా శాశ్వతంగా లక్షలాది ఉద్యోగాలు కోల్పోయే ప్రమాదం ఉందని ఆవేదన వ్యక్తం చేశారు. ఖాళీలను భర్తీ చేయకుండా ఉన్న ఉపాధి ఉద్యోగ అవకాశాలపై దెబ్బ కొట్టడాన్ని తప్పుబట్టారు. దేశ యువతకు ఉద్యోగాలు కల్పించడంలో ప్రధానమంత్రి విఫలమయ్యారని విమర్శించారు. తెలంగాణ యువతకు ఉద్యోగాలు కల్పించే ఐటీఐఆర్‌ ప్రాజెక్టు రద్దు ద్వారా పెద్ద దెబ్బ కొట్టారని తెలిపారు. కేంద్ర ప్రభుత్వ ఉద్యోగాల భర్తీ కోసం యువతతో కలిసి టీఆర్‌ఎస్‌ ఆందోళన బాట పట్టనుందని హెచ్చరించారు. తెలంగాణ ఉద్యమానికి ప్రాతిపదికలైన నీళ్లు, నిధులు, నియామకాలు అనే కీలకాంశాల్లో ప్రజల ఆకాంక్షలను నెరవేర్చే దిశగా తమ ప్రభుత్వం కృషి చేస్తున్నదని పేర్కొన్నారు. యువతకు ఉపాధి కల్పన కోసం రెండంచెల వ్యూహంతో ముందుకెళ్తున్నామని వివరించారు. నూతన రాష్ట్రమైనప్పటికీ వినూత్న, విప్లవాత్మక పారిశ్రామిక విధానాలతో లక్షల కోట్ల రూపాయలను తెలంగాణకు పెట్టుబడులుగా తెచ్చామని గుర్తుచేశారు. పారిశ్రామిక, ప్రయివేటు రంగ ఉద్యోగాల్లో తెలంగాణ ప్రభుత్వం సాధిస్తున్న పురోగతిని కేంద్ర ప్రభుత్వమే పలు వేదికలపై లెక్కలేనన్ని సార్లు ప్రశంసించిన విషయాన్ని ప్రస్తావించారు.
           'దేశ ప్రజలకు ఉద్యోగ, ఉపాధి కల్పించడంలో ప్రధానిగా మీరు విఫలమయ్యారనే భావన నెలకొన్నది. ప్రతిపక్షంలో ఉన్నప్పుడు చేసిన వాగ్దానాలు, చెప్పిన మాటలను అధికారంలోకి వచ్చిన తరువాత మర్చిపోయారు. ఏడాదికి రెండు కోట్ల ఉద్యోగాలు కల్పిస్తామని ఎంతో గంభీరంగా మీరు మాట్లాడినదంతా డాంభికమే అనడానికి ఎనిమిదేండ్ల మీ పాలనే నిదర్శనం. మీ అసమర్థ నిర్ణయాలు, అర్ధిక విధానాలతో కొత్త ఉద్యోగాలు రాలేదు సరికదా ఉన్న ఉపాధి అవకాశాలకు గండి కొట్టారు. మీరు తీసుకున్న నోట్ల రద్దు, కరోనా లాక్‌ డౌన్‌ వంటి అనాలోచిత నిర్ణయాలతో దేశ ప్రజల ఉపాధి, ఉద్యోగ అవకాశాలకు కోలుకోలేని దెబ్బ తాకింది. ఉన్న ఉద్యోగాలు పోయి కేవలం పకోడీ ఉద్యోగాలే మిగిలాయన్నది వాస్తవం. భారీ ఎత్తున ఉద్యోగ, ఉపాధి అవకాశాలు కల్పించే విదేశీ పరిశ్రమలను దేశానికి రప్పించే విషయంలో మీకు ఒక స్పష్టమైన విధానం లేదని చెప్పడానికి నాకెలాంటి సందేహం లేదు. వ్యవసాయం రంగంతో పాటు, దాని తరువాత అత్యధికంగా ప్రజలు ఆధారపడ్డ టెక్స్‌టైల్‌ రంగ అభివృద్ధిపై మీ ప్రభుత్వానికి చిత్తశుద్ధి అసలే లేదు. అందుకే పొరుగునున్న చిన్న దేశాల కన్నా తక్కువమందికి ఈరంగంలో ఉపాధి లభిస్తున్నది. మన ఆర్థిక వ్యవస్థలో కీలకమైన ఈ రెండు రంగాలను మీరు కావాలని విస్మరించడంతోనే ఇవాళ దేశంలో ఉపాధి, ఉద్యోగ అవకాశాలు తగ్గిపోయాయన్నది నిజం. మీ ఈ విధానాల వల్లనే 45 ఏండ్లలో ఎన్నడూ లేనంతగా నిరుద్యోగం పెరిగిందన్న భారత ప్రభుత్వ గణాంకాలే ఇందుకు తిరుగులేని సాక్ష్యం. కేంద్రప్రభుత్వ ఉద్యోగాలను భర్తీ చేయకుండా నిద్రపోతున్నారు. కేంద్ర ప్రభుత్వంలోని ఖాళీలతోపాటు పబ్లిక్‌ సెక్టార్‌ లోని అనేక కంపెనీల్లో ఖాళీగా ఉన్న ఉద్యోగాలను భర్తీ చేయకుండా పెండింగ్‌ లో పెట్టారు. ఒక వైపు ఉన్న ఉద్యోగాలను భర్తీ చేయకుండా తాత్సారం చేస్తున్న మీరు, కేంద్ర ప్రభుత్వ రంగ సంస్థలను అందినకాడికి అమ్ముతూ లక్షలాది ఉద్యోగాలను రద్దు చేస్తున్నారు. ప్రస్తుత లెక్కల ప్రకారం ఖాళీగా ఉన్న 16 లక్షల కేంద్ర ప్రభుత్వ ఉద్యోగాలను మీ నాయకత్వంలోని సర్కార్‌ ఎప్పుడు భర్తీ చేస్తుందనేది భేతాళ ప్రశ్నగా మిగిలిపోయింది' అని కేటీఆర్‌ విమర్శనాస్త్రాలు ఎక్కుపెట్టారు.
           'సబ్‌ కా సాథ్‌ సబ్‌ కా వికాస్‌ అని మీరు ఓ వైపు గప్పాలు కొడుతుంటే మీ పార్టీ నేతలు మాత్రం సబ్‌ కో సత్తేనాశ్‌ కరో అన్నట్టే వ్యవహరిస్తున్నారు. ఈ వైఖరి వల్ల కేవలం దేశంలోనే కాకుండా విదేశాల్లోని భారతీయుల ఉపాధికి ప్రమాదం ఏర్పడుతున్నది. పార్టీ విద్వేష రాజకీయాలతో పారిశ్రామికంగా వెనుకబడే ప్రమాదంలోకి మనదేశం వేగంగా వెళ్తున్నది. ఫలితంగా కోట్లాది మంది ప్రత్యక్ష, పరోక్ష ఉపాధి అవకాశాలు దెబ్బతినే అవకాశం ఉంది' అని ఆయన ఆందోళన వ్యక్తం చేశారు. 'మీరు గతంలో కూడా తెలంగాణకు వచ్చి తియ్యగ, పుల్లగ మాట్లాడిన్రు. కానీ, నయా పైసా సాయం చెయ్యలేదు. కనీసం ఇప్పుడైనా తెలంగాణ గడ్డ నుంచి దేశ యువతకు ఉపాధి-ఉద్యోగ కల్పనపై మీ వైఖరి స్పష్టం చేయండి. దేశ యువత ఉద్యోగాలపైన నేను లేవనెత్తిన అంశాలకు సమాధానం ఇవ్వండి. కేంద్రంలో పెండింగ్‌ లో ఉన్న 16 లక్షల ఉద్యోగాలభర్తీకి ఏం చర్యలు తీసుకుంటారో వివరించండి. లేకుంటే తెలంగాణ యువతతో కలిసి కేంద్రం మీద ఒత్తిడి తీసుకువచ్చేలా, ఉద్యోగాల భర్తీ జరిగేదాకా ఉద్యమిస్తాం' అని కేటీఆర్‌ హెచ్చరించారు.
కేటీఆర్‌ సంధించిన కీలక ప్రశ్నలివే..
1. కేంద్ర ప్రభుత్వ పరిధిలో ఖాళీగా ఉన్న 16 లక్షల ఉద్యోగాలను ఎప్పుడు భర్తీ చేస్తారు?
2. మీరు ఇస్తామన్న రెండు కోట్ల ఉద్యోగాల భర్తీకి సంబంధించి చేపట్టిన చర్యలేంటి?
3. ఏటా మీరిస్తామన్న రెండు కోట్ల ఉద్యోగాల్లో తెలంగాణ యువతకు దక్కే, దక్కిన ఉద్యోగాలు ఎన్ని?
4. ఒకవైపు ప్రభుత్వ ఉద్యోగాలను భర్తీ చేయకుండా ప్రభుత్వ రంగ సంస్థలను ప్రయివేటు పరం చేయడంతో జరుగుతున్న ఉద్యోగాల నష్టంపైన మీ సమాధానమేంటి?
5. ప్రభుత్వ సంస్థలను ప్రయివేటుపరం చేయడంతో ఆయా సంస్థల్లో రిజర్వేషన్‌ అమలుకాదు. ఫలితంగా కోట్లాది దళిత, గిరిజన, బీసీ వర్గాలకు ప్రభుత్వ ఉద్యోగ అవకాశాలు దక్కవు. ఈ విషయంలో ఆయా వర్గాల యువతకు మీరు ఏం సమాధానం చెబుతారు?
6. ఈ దేశ ఆర్థిక వ్యవస్థకు ఇతోధికంగా చేయూతనిస్తున్న తెలంగాణ రాష్ట్రానికి మీరు ఇవ్వాలనుకుంటున్న ప్రాధాన్యమేంటి?
7. ఉపాధి, ఉద్యోగ అవకాశాల కల్పనపై ఇక్కడి యువతకి మీరు ఏం చెబుతారు?
8. హైదరాబాద్‌ ఐటీఐఆర్‌ ప్రాజెక్టు పునరుద్ధరణ, లేనిపక్షంలో ప్రత్యామ్నాయంగా మరో ప్రత్యేక ప్యాకేజీ ఇవ్వాలని ఎనిమిదేండ్లుగా తెలంగాణ యువత తరఫున మేం చేస్తున్న డిమాండ్‌ పై మీ దగ్గర సమాధానం ఉన్నదా?