- ఆర్థిక శాఖ జీవో విడుదల
- ఇప్పటి వరకు 46,998 పోస్టుల భర్తీకి అనుమతులు
నవతెలంగాణ బ్యూరో-హైదరాబాద్‌
             రాష్ట్రంలో ఇప్పటి వరకు 45,325 పోస్టుల భర్తీకి అనుమతులు ఇచ్చిన ఆర్థిక శాఖ , తాజాగా మరో 1,663 ఖాళీల భర్తీకి గ్రీన్‌ సిగల్‌ ఇచ్చింది. పోలీసు, ఫారెస్టు, ఫైర్‌, జైళ్లు, రవాణా, ఎక్సైజ్‌, పంచాయతీరాజ్‌, మున్సిపల్‌ అడ్మినిస్ట్రేషన్‌, సాంఘీక సంక్షేమ శాఖ, విద్య, ఆరోగ్య శాఖల్లో ఖాళీల భర్తీకి అనుమతులు ఇచ్చిన ఆ శాఖ ఇప్పుడు ఇంజినీరింగ్‌ విభాగంలో ఖాళీల భర్తీకి పచ్చ జెండా ఊపింది. నీటిపారుదల, ఆర్‌ అండ్‌ బి శాఖల్లోని 1,522 పోస్టుల భర్తీకి క్లియెరెన్స్‌ ఇచ్చింది. ఇంజినీర్‌ ఇన్‌ చీఫ్‌, ఇరిగేషన్‌ ( అడ్మినిస్ట్రేషన్‌, హైదరాబాద్‌) లో 1,238 పోస్టులు, ఇంజనీర్‌ ఇన్‌ చీఫ్‌ ( ఆర్‌ అండ్‌ బి, ఎన్‌. హెచ్‌, అడ్మినిస్ట్రేషన్‌, ఆర్వోబీ/ ఆర్‌ యూబీ ఎస్‌, హెచ్‌ వోడీ) లో284 పోస్టుల భర్తీకి సర్కారు అనుమతులు మంజూరు చేసింది. వీటితో పాటు డైరెక్టర్‌ ఆఫ్‌ వర్క్స్‌ అక్కౌంట్స్‌ హెచ్‌వోడీలో 53, డెరెక్టర్‌ ఆఫ్‌ గ్రౌండ్‌ వాటర్‌ డిపార్ట్మెంట్‌ ( హెచ్‌వోడీ) లో 88 ఉద్యోగాల భర్తీకి అనుమతినిచ్చింది. ఈ మేరకు ఆర్థిక శాఖ ఉత్తర్వులు జారీ చేసింది. దీంతో ఇప్పటి వరకు ప్రభుత్వం 46,998 పోస్టుల భర్తీకి అనుమతులు ఇచ్చినట్టయింది. ఇప్పటికే ఆయా పోస్టుల భర్తీకి ఉత్తర్వులు కూడా ఇచ్చారు. మిగిలిన పోస్టుల భర్తీకి అనుమతులు ఇచ్చేందుకు వీలుగా కసరత్తును ఆర్థిక శాఖ అధికారులు ముమ్మరం చేశారు. మరి కొద్ది రోజుల్లో మిగిలిన ఖాళీల నియామకాలకు ఆ శాఖ అనుమతులు మంజూరు చేయనుంది.