- కృతజ్ఞతలు తెలిపిన రుద్ర రచన
నవతెలంగాణ బ్యూరో - హైదరాబాద్
మంత్రి కేటీఆర్‌ ఆర్థిక సాయంతో ఇంజినీరింగ్‌ పూర్తి చేసిన ఆ విద్యార్థిని.. నేడు నాలుగు ఐటీ కంపెనీల నుంచి ఉద్యోగావకాశాన్ని అందిపుచ్చుకుంది. ఆపద సమయంలో తనకు అండదండలనిచ్చిన ఆమె... సోమ వారం హైదరాబాద్‌లోని ప్రగతి భవన్‌లో కేటీఆర్‌ను కలిసి కృతజ్ఞతలు తెలిపింది. వివరాల్లోకి వెళ్తే... జగిత్యాల జిల్లా కథలాపూర్‌ మండలం తండ్రియాల గ్రామానికి చెందిన రుద్ర రచన చిన్నప్పుడే తల్లిదండ్రులను కోల్పోయి స్థానిక బాలసదనంలో ఉంటూ అక్కడి ప్రభుత్వ బాలికల హైస్కూల్‌లో పదో తరగతి వరకు చదివింది. ఆ తర్వాత హైదరాబాద్ యూసుఫ్‌ గూడాలోని స్టేట్‌ హౌమ్‌లో ఉంటూ పాలిటెక్నిక్‌ పూర్తి చేసింది. ఈసెట్‌ ప్రవేశ పరీక్ష ద్వారా హైదరాబాద్ సీబీఐటీ కాలేజీలో కంప్యూటర్‌ సైన్స్‌ బ్రాంచ్‌లో ఇంజినీరింగ్‌ సీటు పొందింది. అయితే తల్లిదండ్రులు లేని రుద్ర తన ఇంజినీరింగ్‌ ఫీజులు చెల్లించలేకపోయింది. ఆమె ఆర్థిక ఇబ్బందులను 2019లో సామాజిక మాధ్యమాల ద్వారా తెలుసుకున్న కేటీఆర్‌... రచనను ప్రగతి భవన్‌ పిలిపించుకున్నారు. ఇంజినీరింగ్‌ చదువు పూర్తి అయ్యేందుకు అవసరమైన ఖర్చులను ఆయన వ్యక్తిగతంగా భరిస్తానంటూ హామీని చ్చారు. ఆ మేరకు ఆర్థిక సాయం చేశారు. కేటీఆర్‌ అందించిన ఆర్థిక సాయంతో ఇంజినీరింగ్‌ చదువుతున్న రుద్ర రచన, ఇటీవల జరిగిన క్యాంపస్‌ ప్లేస్‌మెంట్స్‌లో నాలుగు ప్రముఖ కంపెనీల్లో ఉద్యోగాన్ని సాధించింది. ఈ సందర్భంగా మంత్రి కేటీఆర్‌ను కలిసింది. ఆమె చదువు, ఉద్యోగాల విషయం తెలుసుకున్న ఆయన ఎంతో సంతోషించారు. తనకంటూ ఎవరూ లేకున్నా ఆత్మ విశ్వాసంతో రుద్ర రచన జీవితంలో విజయం సాధించిం దంటూ మెచ్చుకున్నారు. తల్లిదండ్రులు లేని తనకు మంత్రి కేటీఆర్‌ ఒక అన్నగా అండగా నిలబడ్డారనీ, తన కలల సాకారం కోసం తండ్రిగా తపించారని రచన భావోద్వేగానికి లోనైంది. తాను పొదుపు చేసిన డబ్బులతో తయారు చేయించిన వెండి రాఖీని కేటీఆర్‌కు కట్టి కృతజ్ఞతలు తెలిపింది. రచన మాటలకు, అభిమానానికి కేటీఆర్‌ భావోద్వేగానికి లోనయ్యారు. ఆమె జీవితంలో మరింత స్థిరపడేందుకు చేసే ప్రతి ప్రయత్నానికి అండగా ఉంటానని భరోసా ఇచ్చారు. జీవి తంలో అనేక కష్టాలు ఎదుర్కొని వాటిని సవాలుగా స్వీక రించి నాలుగు కంపెనీలలో ఉద్యోగాలు సాధించిన రచన యువతరానికి ముఖ్యంగా గ్రామీణ ప్రాంత విద్యా ర్థులకు ఆదర్శంగా నిలిచిందన్నారు. భవిష్యత్తులో సివిల్‌ సర్వీ సెస్‌ పరీక్ష రాసి సివిల్‌ సర్వెంట్‌ కావాలన్న తన లక్ష్యానికి అండగా ఉంటానని హామీ ఇచ్చారు. రచన చివరి సంవ త్సరం ఇంజినీరింగ్‌ ఫీజు, హాస్టల్‌ బకాయిల కోసం అవస రమైన మొత్తం నగదు సాయాన్ని ఆయన అందించారు.
