- సీఎం కేసీఆర్‌
నవతెలంగాణబ్యూరో-హైదరాబాద్‌
తెలంగాణ సాయుధ పోరాటం వీరనారి, చిట్యాల ఐలమ్మ బహుజన ఆత్మగౌరవానికి ప్రతీక అని ముఖ్యమంత్రి కె. చంద్రశేఖరరావు అన్నారు. ఐలమ్మ జయంతి (సెప్టెంబర్‌ 26) సందర్భంగా ఆదివారం ఆమెచిత్రపటానికి సీఎం కేసీఆర్‌ నివాళులర్పించారు. నాటి తెలంగాణ సాయుధ పోరాటంలో ఐలమ్మ ప్రదర్శించిన ధైర్యసాహసాలు, ప్రజాస్వామిక పోరాటాలకు స్ఫూర్తిగా నిలిచాయని పేర్కొన్నారు. తెలంగాణ జాతీయ సమైక్యతా వజ్రోత్సవాల నేపథ్యంలో ఆమె సేవలను సీఎం కేసీిఆర్‌ స్మరించుకున్నారు. భూమి కోసం, భుక్తి కోసం, వెట్టిచాకిరి నుంచి విముక్తి కోసం సాగిన సాయుధ పోరాటంలో ఐలమ్మ ప్రదర్శించిన తెగువ, పౌరుషం తెలంగాణ అస్తిత్వాన్ని, ఆత్మగౌరవాన్ని చాటి చెప్పాయని తెలిపారు. తెలంగాణ మట్టిలోనే పోరాటతత్వముందని చెప్పేందుకు ఆమె జీవితమే నిదర్శనమని పేర్కొన్నారు. హక్కుల కోసం ఐలమ్మ చేసిన ఆత్మగౌరవ పోరాట స్ఫూర్తితో తెలంగాణ ప్రజల హక్కుల సాధన కోసం రాష్ట్ర ప్రభుత్వం కృషి చేస్తున్నదని తెలిపారు. ఐలమ్మ జయంతి, వర్థంతి కార్యక్రమాలను అధికారికంగా నిర్వహిస్తూ సబ్బండ వర్గాల త్యాగాలను స్మరించుకుంటున్నామని సీఎం గుర్తు చేశారు.