- అక్కడక్కడా భారీ వర్షాలు పడే అవకాశం
- పలు జిల్లాలకు ఆరెంజ్‌, ఎల్లో హెచ్చరికల జారీ
- జనగామ జిల్లా కొడకండ్లలో 12 సెంటీమీటర్ల అతిభారీ వర్షం
నవతెలంగాణ బ్యూరో-హైదరాబాద్
రాష్ట్రంలో వచ్చే మూడ్రోజుల పాటు తేలిక పాటి నుంచి మోస్తరు వానలు, అక్కడక్కడా భారీ వర్షాలు పడే అవకాశం ఉందని హైదరాబాద్ వాతావరణ కేంద్రం ప్రధాన సంచాలకులు కె.నాగరత్న తెలిపారు. గురువారం రాష్ట్రంలో పలుచోట్ల తేలికపాటి నుంచి భారీ వర్షాలుపడ్డాయి. గురువారం రాత్రి పదున్నర వరకు రాష్ట్రంలో 579 ప్రాంతాల్లో వర్షపాతం నమోదైంది. జనగామ జిల్లా కొడకండ్లలో అత్యధికంగా 12 సెంటీమీటర్ల అతి భారీ వర్షం కురిసింది. యాదాద్రి భువనగిరి, జనగామ, రంగారెడ్డి, వికారాబాద్‌, మహబూబ్‌నగర్‌ జిల్లాల్లో పలు చోట్ల భారీ వర్షం వర్షం పడింది. నల్లగొండ, సూర్యాపేట, యాదాద్రి భువనగిరి, సంగారెడ్డి, మెదక్ జిల్లాల్లో పలుచోట్ల అత్యంత భారీ వర్షాలు పడే అవకాశం ఉన్న నేపథ్యంలో ఆ జిల్లాలకు వాతావరణ శాఖ ఆరెంజ్‌ అలర్ట్‌ జారీ చేసింది. కొమ్రంభీం ఆసిఫాబాద్‌, మంచిర్యాల, కరీంనగర్, పెద్దపల్లి, జయశంకర్‌ భూపాలపల్లి, ములుగు, భద్రాద్రి కొత్తగూడెం, ఖమ్మం, మహబూబాబాద్‌, వరంగల్, హనుమకొండ, జనగామ, సిద్ధిపేట, రంగారెడ్డి, హైదరాబాద్, మేడ్చల్‌ మల్కాజ్‌గిరి, కామారెడ్డి, మహబూబ్‌నగర్‌, నాగర్‌ కర్నూల్‌, వనపర్తి, నారాయణపేట, జోగులాంబ గద్వాల జిల్లాల్లో కూడా భారీ వర్షాలు పడే అవకాశముంది. ఈ జిల్లాలు ఎల్లో హెచ్చరిక జాబితాలో ఉన్నాయి.
