- 3,4 తేదీల్లో ధ్రువపత్రాల పరిశీలన
- 6 వరకు వెబ్‌ఆప్షన్ల నమోదు
- 9న తొలివిడత సీట్ల కేటాయింపు
- షెడ్యూల్‌ విడుదల
నవతెలంగాణ బ్యూరో - హైదరాబాద్
రాష్ట్రంలో 2022-23 విద్యాసంవత్సరానికి సంబంధించి బీ ఫార్మసీ, ఫార్మా-డీ, బయోటెక్నాలజీ, ఫార్మాసూటికల్‌ ఇంజినీరింగ్‌ కోర్సుల్లో ప్రవేశాల కు ఎంసెట్‌ బైపీసీ విద్యార్థులకు వచ్చేనెల ఒకటో తేదీ నుంచి కౌన్సెలింగ్‌ ప్రక్రియ ప్రారంభం కానుంది. ఈ మేరకు సాంకేతిక విద్యాశాఖ కమిషనర్‌, ఎంసెట్‌ ప్రవేశాల కన్వీనర్‌ నవీన్‌ మిట్టల్‌ శనివారం షెడ్యూల్‌ను విడుదల చేశారు. వచ్చేనెల ఒకటి నుంచి 3 వరకు ఆన్‌లైన్‌లో ప్రాథమిక సమాచారం అందుబాటులో ఉంటుందనీ, ప్రాసెసింగ్‌ ఫీజు చెల్లించాలనీ, హెల్ప్‌లైన్‌ సెంటర్లలో ధ్రువపత్రాల పరిశీలనకు వెళ్లేందుకు స్లాట్‌ బుకింగ్‌ చేసుకోవాలని సూచించారు. వచ్చేనెల మూడు, నాలుగు తేదీల్లో ధ్రువపత్రాల పరిశీలన ఉంటుందని తెలిపారు. అదేనెల మూడు నుంచి ఆరు వరకు వెబ్‌ఆప్షన్ల నమోదుకు అవకాశముంటుందని వివరించారు. తొమ్మిదిన తొలివిడత కౌన్సెలింగ్‌లో అభ్యర్థులకు సీట్లు కేటాయిస్తామని పేర్కొన్నారు. వచ్చేనెల తొమ్మిది నుంచి 13 వరకు ట్యూషన్‌ ఫీజు చెల్లింపు, ఆన్‌లైన్‌ ద్వారా సెల్ఫ్‌ రిపోర్టింగ్‌ చేయాల్సి ఉంటుందని వివరించారు. వచ్చేనెల 17 నుంచి తుది విడత కౌన్సెలింగ్‌ ప్రక్రియ ప్రారంభమవుతుందని తెలిపారు. 17న ఆన్‌లైన్‌ లో ప్రాథమిక సమాచారం అందుబాటులో ఉంటుందనీ, ప్రాసెసింగ్‌ ఫీజు చెల్లించాలనీ, హెల్ప్‌లైన్‌ సెంటర్లలో ధ్రువపత్రాల పరిశీలనకు వెళ్లేందుకు స్లాట్‌ బుకింగ్‌ చేసుకోవాలని సూచించారు. 18న ధ్రువపత్రాల పరిశీలన జరుగుతుందనీ, 17 నుంచి 19 వరకు వెబ్‌ఆప్షన్లు నమోదు చేయాలని కోరారు. 22న తుదివిడత కౌన్సెలింగ్‌లో సీట్లు కేటాయిస్తామని వివరించారు. వచ్చే నెల 22 నుంచి 24 వరకు ట్యూషన్‌ ఫీజు చెల్లించాలనీ, వెబ్‌సైట్‌ ద్వారా సెల్ఫ్‌రిపోర్టింగ్‌ చేయాలని కోరారు. 22 నుంచి 25 వరకు కేటాయించిన కాలేజీల్లో అభ్యర్థులు రిపోర్టు చేయాలని సూచించారు. ఇతర వివరాల కోసం https://tseamcetb.nic.in వెబ్‌సైట్‌ను సంప్రదించాలని కోరారు.
23న స్పాట్‌ అడ్మిషన్ల మార్గదర్శకాలు
ప్రయివేటు ఇంజినీరింగ్‌, ఫార్మసీ కాలేజీల్లో ఎంసెట్‌ బైపీసీ విద్యార్థుల స్పాట్‌ అడ్మిషన్లకు సంబంధించిన మార్గదర్శకాలను వచ్చేనెల 23న విడుదల చేస్తామని నవీన్‌ మిట్టల్‌ తెలిపారు. ఇతర వివరాల కోసం https://tseamcetb.nic.in వెబ్‌సైట్‌ను సంప్రదించాలని కోరారు.
బీఫార్మసీలో కన్వీనర్‌ కోటా సీట్లు 9,150
రాష్ట్రంలో బీఫార్మసీ కోర్సులో గత విద్యాసంవత్సరంలో కన్వీనర్‌ కోటా సీట్లు 9,150 ఉన్నాయి. ఇందులో 118 బీఫార్మసీ కాలేజీల్లో 7,758 సీట్లు, 60 ఫార్మా-డీ కాలేజీల్లో 1,330 సీట్లు, ఒక ఫార్మాసూటికల్‌ ఇంజినీరింగ్‌ కాలేజీలో 33 సీట్లు, ఒక బయోటెక్నాలజీ కాలేజీలో 29 సీట్లు అందుబాటులో ఉన్నాయి.
