- ఇంటర్ బోర్డు కార్యదర్శికి విద్యాశాఖ కార్యదర్శికి ఆదేశం
నవతెలంగాణ బ్యూరో - హైదరాబాద్
ఇంటర్మీడియెట్‌ విద్యా కమిషనర్‌గా, బోర్డు కార్యదర్శిగా పనిచేసిన సయ్యద్‌ ఒమర్‌ జలీల్‌ గతనెల 30న ఉద్యోగ విరమణ పొందారని తెలంగాణ ఇంటర్మీడియెట్‌ గవర్నమెంట్‌ లెక్చరర్ల సంఘం (టిగ్లా) అధ్యక్షులు మైలారం జంగయ్య, ప్రధాన కార్యదర్శి మాచర్ల రామకృష్ణగౌడ్‌ సోమవారం ఒక ప్రకటనలో తెలిపారు. నిబంధనలకు విరుద్ధంగా ఆయన చేసిన డిప్యూటేషన్లు, అదర్‌ డ్యూటీ (ఓడీ)లకు సంబంధించి ఆధారాలతో సహా రాష్ట్ర ప్రభుత్వానికి, విజిలెన్స్‌ విభాగానికి ఫిర్యాదు చేశామని పేర్కొన్నారు. దీనికి స్పందించిన విద్యాశాఖ కార్యదర్శి వాకాటి కరుణ ఆగస్టు ఒకటి నుంచి అక్టోబర్‌ ఒకటి వరకు డిప్యూటేషన్లు, ఓడీలకు సంబంధించిన ఉత్తర్వుల వివరాలను సమర్పించాలంటూ ఇంటర్ బోర్డు కార్యదర్శిని ఆదేశించారు. వాటితోపాటు ఇంటర్ బోర్డు, ఇంటర్ విద్యా కమిషనర్‌ కార్యాలయాల్లో చేసిన ఖర్చుల వివరాలనూ ప్రభుత్వానికి పంపాలని కోరారు.
