- ఎమ్‌బీబీఎస్‌ విద్యార్థినికి ఎమెల్సీ కవిత భరోసా
నవతెలంగాణ-హైదరాబాద్‌బ్యూరో
యూట్యూబ్‌ ద్వారా క్లాసులు విని ఎంబీబీఎస్‌ సీటు సాధించిన నిజామాబాద్‌ జిల్లా నాందేవ్‌గూడకు చెందిన హారికకు ఎమ్మల్సీ కల్వకుంట్ల కవిత అండగా నిలిచారు. ఎంబీబీఎస్‌ సీటు సాధించినా, ఆర్థిక స్తోమత లేని కారణంగా కాలేజీలో చేరలేని పరిస్థితిని మీడియా కథనాల ద్వారా తెలుసుకున్న ఎమ్మెల్సీ కల్వకుంట్ల కవిత తక్షణమే స్పందించారు. తన నిజామాబాద్‌ పర్యటనలో హారికను కలిసి ఎంబీబీఎస్‌ కోర్సును పూర్తి చేయడానికి అయ్యే ఖర్చును తానే భరిస్తానని భరోసానిచ్చారు. దానిలో భాగంగా మొదటి ఏడాదికి సంబంధించి కాలేజీ ఫీజుని చెక్కు రూపంలో అందించారు. చదువుకోవాలన్న ఆకాంక్ష, తపన ఉంటే ప్రపంచంలోని ఏ శక్తి అడ్డుకోలేదనీ, చదువుకు పేదరికం అడ్డుకాదని హారిక నిరూపించారని ఈ సందర్భంగా కవిత అన్నారు. ఆమె చదువులో రాణించి, వైద్యురాలిగా సమాజానికి సేవలు అందించాలని ఆకాంక్షించారు. ఈసందర్భంగా హారిక భావోద్వేగానికి గురయ్యారు. ఎమ్మెల్సీ కవిత ఆకాంక్షలు తీరుస్తానని చెప్పారు. హారిక తల్లిదండ్రులు సంతోషం వ్యక్తం చేశారు.