- అమెరికన్‌ హ్యాండ్లూమ్‌ రీసెర్చ్‌ స్కాలర్‌ కైరా జాప్‌ గాబ్రియేల్‌ :మంత్రి కేటీఆర్‌తో భేటీ
నవతెలంగాణ బ్యూరో - హైదరాబాద్
తెలంగాణ చేనేత వస్త్ర పరిశ్రమ నైపుణ్యం, ఆ రంగానికి ప్రభుత్వం అందిస్తున్న సహకారం అద్భుతమని అమెరికాకు చెందిన హ్యాండ్లూమ్‌, టెక్స్‌టైల్‌ రీసెర్చ్‌ స్కాలర్‌ కైరాజాప్‌ గాబ్రియేల్‌ ప్రశంసలు కురిపించారు. దీర్ఘకాలంపాటు తాను కొనసాగిస్తున్న చేనేత అధ్యయనంలో భాగంగా ఆమె తెలంగాణలో పర్యటిస్తున్నారు. అందులో భాగంగా బుధవారం హైదరాబాద్‌లోని ప్రగతిభవన్‌లో టెక్స్‌టైల్‌ శాఖ మంత్రి కేటీ రామారావుతో ఆమె భేటీ అయ్యారు. ఇప్పటికే రాష్ట్రంలోని పోచంపల్లి, సిద్ధిపేట, సిరిసిల్ల, జనగామ, నారాయణపేట, గద్వాల ప్రాంతాల్లో కొనసాగుతున్న చేనేత వస్త్రాల ఉత్పత్తి, అక్కడి స్థితిగతులపైన ఆమె క్షుణ్నంగా అధ్యయనం చేశారు. రాష్ట్రంలో తాను పర్యటించిన ప్రాంతాల్లో గుర్తించిన అనేక ముఖ్యమైన అంశాలను కేటీఆర్‌తో ముచ్చటించారు. నేతన్నల కు ముఖ్యంగా చేనేత పరిశ్రమకు రాష్ట్ర ప్రభుత్వం అందిస్తున్న కార్యక్రమాలతో పాటు వారి కోసం చేపట్టిన సంక్షేమ కార్య క్రమాల గురించి కైరాకు మంత్రి వివరించారు. ఇక్కడి చేనేతల్లో ఉన్న కళా నైపుణ్యం ఎంతో విలువైందన్న కైరా, ప్రపంచ మార్కెట్లలో దీనికి అద్భుతమైన డిమాండ్‌ ఉందన్నారు. భారతదేశంలో చేనేత ఉత్పత్తులు కేవలం చీరలకు మాత్రమే పరిమితం అవుతున్నాయనీ, దుస్తులు, ఇతర ఉత్పత్తులకు చేనేత, పట్టు పరిశ్రమలను అనుసంధానం చేస్తే మంచి మార్కెట్‌ ఏర్పడుతుందని సూచించారు. ఇక్కడి పవర్‌లూమ్‌ కార్మికులు సైతం డబుల్‌ జకార్డ్‌ వంటి వినూత్నమైన టెక్నిక్‌లతో దుస్తులను నేయడం బాగుందన్నారు. ఇన్నోవేషన్‌, టెక్నాలజీని హ్యాండ్లూమ్‌ రంగానికి అనుసంధానిస్తే భవిష్యత్తు తరాలకి చేనేత కళ సమున్నతంగా అందుతుందన్న విశ్వాసం తనకుందని కైరా వివరించారు. చేనేత కళా నైపుణ్యం, వస్త్రాలపై ప్రేమతో దీర్ఘకాల పరిశోధన కోసం సమయాన్ని వెచ్చిస్తున్న కైరా ప్రయత్నానికి మంత్రి కేటీఆర్‌ అభినందనలు తెలిపారు. పరిశ్రమ అభివృద్ధికి వారి నుంచి విలువైన సూచన లు తీసుకుంటామన్నారు. దీంతో పాటు ఇతర దేశాల్లో చేనేత వస్త్ర పరిశ్రమ ఉన్నతికి అమలవుతున్న కార్యక్రమాల గురించి వారి నుంచి సమాచారం తెలుసుకుంటామన్నారు. భారతదేశం లో పర్యటిస్తున్న సందర్భంగా ఇతర రాష్ట్రాల టెక్స్‌ టైల్‌ శాఖలతో సమన్వయం చేసే విషయంలో కైరాకు సహాయం చేయాలని తెలంగాణ టెక్స్‌ టైల్‌, చేనేత అధికారులను మంత్రి కేటీఆర్‌ ఆదేశించారు.
