నవతెలంగాణబ్యూరో-హైదరాబాద్‌
రాష్ట్ర ప్రజలను చలి గజగజ వణికిస్తున్నది. రాష్ట్రంలో మరో మూడ్రోజులు ఇదే పరిస్థితి కొనసాగనున్నది. ముఖ్యంగా ఉత్తర తెలంగాణ జిల్లాల్లో చలితీవ్రత ఎక్కువ ఉండే అవకాశం ఉంది. మెదక్‌, సంగారెడ్డి, ఆదిలాబాద్‌ జిల్లాల్లో చల్లని గాలులు వీచే సూచనలు కనిపిస్తున్నాయి. రాష్ట్రంలో, హైదరాబాద్‌ నగరంలో ఉదయం పూట పొగమంచు ఏర్పడే అవకాశముంది. రాష్ట్రం మీదుగా తూర్పు, ఈశాన్య దిశల నుంచి చల్లని గాలులు వీస్తున్నాయి. తెలంగాణ స్టేట్‌ డెవలప్‌మెంట్‌ ప్లానింగ్‌ సొసైటీ (టీఎస్‌డీపీఎస్‌) నివేదిక ప్రకారం మంగళవారం కొమ్రంభీమ్‌ అసిఫాబాద్‌ జిల్లా సిర్పూర్‌(యు)లో అత్యల్పంగా 5.9 డిగ్రీల కనిష్ట ఉష్ణోగ్రత నమోదైంది. రాష్ట్రంలో చాలా జిల్లాల్లో పది డిగ్రీల లోపు ఉష్ణోగ్రతలు రికార్డ య్యాయి. బుధవారం నాడు కూడా 15కుపైగా జిల్లాల్లో కనిష్ట ఉష్ణోగ్రతలు పది డిగ్రీల లోపే నమోదయ్యే అవకాశం ఉందని టీఎస్‌డీపీఎస్‌ తన వెదర్‌ రిపోర్టులో పేర్కొంది.