- మూడు జిల్లాల్లో రెడ్‌ అలర్ట్‌
తిరువనంతపురం : కేరళను మరోసారి భారీ వానలు ముంచెత్తుతున్నాయి. శనివారం రాత్రి నుండి పలు ప్రాంతాల్లో ఎడతెరిపి లేకుండా భారీ వర్షాలు కురుస్తున్నాయి. ఎర్నాకులం, ఇడుక్కి, త్రిసూర్‌ జిల్లాల్లో భారత వాతావరణ విభాగం (ఐఎండి) రెడ్‌ అలర్ట్‌ను ప్రకటించింది. తిరువంతపురం, కొల్లాం, పథనంథిట్ట, అలపుజ, కొట్టాయం, కొజికొడ్‌, కన్నూర్‌, కసరగాడ్‌ జిల్లాలకు ఆరెంజ్‌ ఎలర్ట్‌, పలక్కడ్‌, మలప్పురం, వాయనాడ్‌ జిల్లాలకు యెల్లో ఎలర్ట్‌ ప్రకటించింది. రాష్ట్రంలో సోమ, మంగళవారాల్లోనూ భారీ వర్షాలు కురిసే అవకాశాలున్నాయని హెచ్చరించింది. కేరళలో పలుచోట్ల కొండచరియలు విరిగి పడ్డాయి. జలాశయాల్లో నీటిమట్టాలు పెరిగాయి. ముల్లపెరియార్‌ డ్యామ్‌ మట్టం 140 అడుగుల మేర పెరిగిందని, మరింత పెరిగితే షట్టర్లు తెరిచే అవకాశాలున్నాయని తమిళనాడు ప్రభుత్వం వెల్లడించింది.