- ఏపీలో 50 లక్షల విద్యార్థులకిపైగా...
- కేంద్ర, రాష్ట్ర ప్రభుత్వాలు, ప్రపంచ బ్యాంక్‌ మధ్య ఒప్పందం
- 1,861 కోట్ల ప్రాజెక్టుపై సంతకాలు
న్యూఢిల్లీ : ఆంధ్రప్రదేశ్‌లోని విద్యార్థుల అభ్యసన నాణ్యతకు ప్రపంచ బ్యాంకు రుణం ఇవ్వనుంది. ఈమేరకు కేంద్ర, రాష్ట్ర ప్రభుత్వాలు, ప్రపంచ బ్యాంక్‌ మధ్య రుణ ఒప్పందం జరిగింది. 50 లక్షల మందికి పైగా విద్యార్థుల అభ్యసన నాణ్యతను మెరుగుపరిచే లక్ష్యంతో రూ.1,861.20 కోట్ల (250 మిలియన్‌ డాలర్ల) విలువ చేసే ప్రాజెక్ట్‌ కోసం కేంద్ర ప్రభుత్వం, ఆంధ్రప్రదేశ్‌ ప్రభుత్వం, ప్రపంచ బ్యాంకు చట్టపరమైన ఒప్పందాలపై సంతకం చేశాయని కేంద్ర ఆర్థిక మంత్రిత్వ శాఖ తెలిపింది. ఈ ఒప్పందంపై కేంద్ర ప్రభుత్వం తరఫున కేంద్ర ఆర్థిక మంత్రిత్వ శాఖ అదనపు కార్యదర్శి రజత్‌ కుమార్‌ మిశ్రా, ఆంధ్రప్రదేశ్‌ ప్రభుత్వం తరఫున డిపార్ట్‌మెంట్‌ స్కూల్‌ ఎడ్యుకేషన్‌ ప్రిన్సిపల్‌ సెక్రెటరీ బుడితి రాజశేఖర్‌, ప్రపంచ బ్యాంక్‌ తరఫున ఇండియా కంట్రీ డైరెక్టర్‌ జునైద్‌ అహ్మద్‌ సంతకం చేశారు. పాఠశాల విద్య అన్ని తరగతుల విద్యార్థులు ఈ ప్రాజెక్ట్‌ నుంచి ప్రయోజనం పొందుతారని పేర్కొంది. 45,000కు పైగా ప్రభుత్వ పాఠశాలల్లో 40 లక్షల మంది విద్యార్థులు (ఆరు నుంచి పద్నాలుగు సంవత్సరాల మధ్య), అంగన్‌వాడీల్లో చేరిన (సమీకృత శిశుఅభివృద్ధి కేంద్రాలు) 10 లక్షల మంది పిల్లలు (మూడు నుంచి ఆరు సంవత్సరాల మధ్య), సుమారు 1, 90,000 మంది ఉపాధ్యాయులు, 50,000 మందికి పైగా అంగన్‌వాడీ కార్యకర్తలు ప్రయోజనం పొందుతారు.''ఆంధ్రా లెర్నింగ్‌ ట్రాన్స్‌ఫర్మేషన్‌ ప్రాజెక్ట్‌ ఉపాధ్యాయుల వృత్తిపరమైన అభివృద్ధిని ప్రోత్సహిస్తుంది. కరోనా మహమ్మారికి ప్రభావితమైన పిల్లలకు నివారణ అభ్యాస కోర్సులను అందించడం. ప్రత్యేక అవసరాలు కలిగిన పిల్లలు, షెడ్యూల్డ్‌ తెగలు, బాలికలతో సహా అట్టడుగు వర్గాలకు చెందిన విద్యార్థులపై ప్రత్యేక శ్రద్ధ వహించండి'' వంటి వాటికి సహకారం అందిస్తుంది. ''నాణ్యమైన విద్యకు సార్వత్రిక ప్రాప్యతను అందించడం దేశ ఆర్థిక, సామాజిక అభివృద్ధికి ప్రధానమైనది. కోవిడ్‌-19 మహమ్మారి వల్ల ప్రభావితమైన పిల్లల అభ్యాస నష్టాలను పరిష్కరించడంతోపాటు, చిన్న పిల్లలకు పునాది అభ్యాసంపై దృష్టి సారించే శక్తివంతమైన సంస్థలుగా ప్రభుత్వ పాఠశాలలను మార్చాలనే దాని లక్ష్యాన్ని నెరవేర్చడంలో ఈ ప్రాజెక్ట్‌ ఆంధ్రప్రదేశ్‌ రాష్ట్రానికి మద్దతు ఇస్తుంది'' అని కేంద్ర ఆర్థిక మంత్రిత్వ శాఖ పేర్కొంది.