- 69 వేల టీచర్‌ రిక్రూట్‌మెంట్‌ స్కాంకు వ్యతిరేకంగా నిరసన
- యూపీలో ఖాకీల వీరంగం..
లక్నో : 69 వేల టీచర్ల భర్తీలో స్కామ్‌కు బాధ్యులెవరంటూ.. నిరసన చేపట్టిన యువతపై ఖాకీలు వీరంగం సృష్టించారు. లాఠీలతో దొరికిన వారిని దొరికినట్టు బాదారు. పోలీసుల కొడుతున్న దెబ్బలకు తాళలేక పెద్ద ఎత్తున యువకులకు గాయాలయ్యాయి.
ఈ స్కామ్‌కు బాధ్యులెవరు..?
2017..యూపీలో బీజేపీ అధికారంలోకి వచ్చాక..మెరుగైన విద్య, భద్రత, ఉపాధి హామీలు గుమ్మరించింది. అయితే అధికారంలోకి వచ్చిన బీజేపీ యోగి ఆదిత్యనాథ్‌ ప్రభుత్వం ప్రస్తుతం విద్యారంగంలో అవినీతి, రిగ్గింగ్‌కు పాల్పడుతోంది.ఒకవైపు యూపీ టెట్‌ పేపర్ లీక్‌ కావడంతో.. కొద్ది గంటలకు ముందు పరీక్షను రద్దు చేసింది. మరోవైపు 69 వేల మంది టీచర్ల రిక్రూట్‌మెంట్‌ వ్యవహారం గత మూడేండ్లుగా నలుగుతోంది. స్కామ్‌కు బాధ్యులెవరు తేల్చాలం టూ..అభ్యర్థులు భారీ ప్రదర్శన నిర్వహించారు. ఆందోళనకారులపై పోలీసులు రెచ్చిపోయారు.లాఠీచార్జి చేశారు. దొరికిన వారిని దొరికినట్టు బాదేశారు. దీంతో యోగి పాలనలో టీచర్ల రిక్రూట్‌మెంట్‌ అంశం మరోసారి అగ్గిరాజేస్తోంది.
అసలేం జరిగింది..?
డిసెంబర్‌ 2018 ..ఉత్తరప్రదేశ్‌లోని యోగి ప్రభుత్వం ప్రభుత్వ ప్రాథమిక పాఠశాలల్లో 69 వేల అసిస్టెంట్‌ టీచర్ల భర్తీకి ఖాళీలను ప్రకటించింది. దీని కోసం దాదాపు నాలుగు లక్షల మంది అభ్యర్థులు దరఖాస్తు చేసుకున్నారు. 2019..జనవరి 6న రాత పరీక్షకు హాజరయ్యారు. అయితే పరీక్ష ముగిసిన ఒక్కరోజులోనే కటాఫ్‌ మార్కుల ప్రమాణాన్ని ప్రభుత్వం ఖరారు చేయడంతో రచ్చగా మారింది. అప్పటి నుంచి హైకోర్టు, సుప్రీంకోర్టు తీర్పులతో రాష్ట్రంలోని 69 వేల టీచర్‌ రిక్రూట్‌మెంట్‌ కేసులు పతాక శీర్షికల్లో నిలిచాయి.
నిరసనకారులు ఏం చెబుతున్నారంటే...?
69 వేల టీచర్‌ రిక్రూట్‌మెంట్‌ విషయంలో అభ్యర్థులు శాంతియుతంగా క్యాండిల్‌ మార్చ్‌ తలపెట్టారు. ముఖ్యమంత్రి నివాసం వైపు వెళ్లడం ప్రారంభించిన ప్రదర్శనను.. పోలీసులు అడ్డుకునేందుకు ప్రయత్నించారు. అభ్యర్థులు అక్కడే బైటాయించి నిరసన తెలపడంతో పోలీసులు లాఠీచార్జి చేశారు. అంతకుముందు ఈ అభ్యర్థులు బీజేపీ కార్యాలయం వెలుపల భిక్షాటన చేస్తూ నిరసన తెలిపారు.69 వేల టీచర్‌ రిక్రూట్‌మెంట్‌ విషయంలో 22 నుంచి 23 వేల సీట్లలో రిజర్వేషన్‌ నిబంధనలు పాటించలేదని నిరసన తెలుపుతున్న అభ్యర్థులంటున్నారు. ఈ రిక్రూట్‌మెంట్‌లో ఓబీసీ అంటే ఇతర వెనుకబడిన తరగతులకు మొత్తం 18,598 సీట్లు ఉండగా, కేవలం 2,637 సీట్లకు మాత్రమే అడ్మిషన్లు లభించాయని అంటున్నారు.ఈ రిక్రూట్‌మెంట్‌లో రిజర్వేషన్ల కుంభకోణం జరిగిందని వారు ఆరోపిస్తున్నారు. ఉదాహరణకు, జనరల్‌ కేటగిరీ అభ్యర్థులకు ఒబీసీ కేటగిరీ కింద రిజర్వ్డ్‌ సీట్లలో అపాయింట్‌మెంట్‌ ఇచ్చారు.
లాఠీచార్జిపై విపక్షాల ఆగ్రహం
నిరసన తెలుపుతున్న అభ్యర్థులపై పోలీసులు లాఠీచార్జి చేయడంతో రాష్ట్ర రాజకీయ వేడి కూడా పెరిగింది. ఈ మొత్తం ఘటనపై అధికార పక్షంపై విపక్షాలు ఆగ్రహం వ్యక్తం చేశాయి. సమాజ్‌ వాదీ పార్టీ, బహుజన్‌ సమాజ్‌ పార్టీ, కాంగ్రెస్‌ సహా అన్ని పార్టీలు ఈ ఘటనను ఖండించగా, బీజేపీ నేత, ఎంపీ వరుణ్‌ గాంధీ కూడా తన సొంత పార్టీ పాలనపై ప్రశ్నలు సంధించారు.లాఠీ చార్జీని ప్రశ్నిస్తూ, బీజేపీ ఎంపీ వరుణ్‌ గాంధీ ట్వీట్‌ చేస్తూ, ''ఈ పిల్లలు కూడా మా భారతి కే లాల్‌. వాటిని వినడానికి దూరంగా, ఎవరూ వినడానికి సిద్ధంగా లేరు. దీనిపై కూడా వారిపై ఈ అనాగరిక లాఠీ చార్జి. మీ గుండెల మీద చేయి వేసుకుని ఆలోచించండి. మీకు అర్హత ఉన్న అభ్యర్థులతోపాటు ఖాళీలు ఉన్నాయి, కాబట్టి రిక్రూట్‌మెంట్‌ ఎందుకు చేయకూడదు?''దని ప్రశ్నించారు.ఉత్తరప్రదేశ్‌ మాజీ ముఖ్యమంత్రి, సమాజ్‌వాదీ పార్టీ అధ్యక్షుడు అఖిలేశ్‌ యాదవ్‌ ట్వీట్‌ చేస్తూ, ''బీజేపీ పాలనలో భవిష్యత్‌ ఉపాధ్యాయులపై లాఠీచార్జి చేయడం ద్వారా విశ్వగురువుగా మారే మార్గం సుగమం అవుతోంది. 69 వేల టీచర్ల రిక్రూట్‌మెంట్‌ డిమాండ్‌తో మేమున్నాం.అని పేర్కొన్నారు.కాంగ్రెస్‌ మాజీ అధ్యక్షుడు, లోక్‌సభ ఎంపీ రాహుల్‌గాంధీ ట్వీట్‌ చేస్తూ.. 'ఉద్యోగం కోసం ఎదురుచూస్తున్న వారికి యూపీ ప్రభుత్వం కర్రలు ఇచ్చింది. బీజేపీ ఓట్లు అడగడానికి వస్తే ఇప్పుడు గుర్తుపెట్టుకోండి.అని సూచన చేశారు.ఉత్తరప్రదేశ్‌ మాజీ ముఖ్యమంత్రి, బీఎస్పీ అధినేత్రి మాయావతి కూడా యోగి ప్రభుత్వాన్ని లక్ష్యంగా చేసుకుని ట్వీట్‌ చేశారు, శాంతియుతంగా క్యాండిల్‌ మార్చ్‌ చేపట్టిన వందలాది మంది యువకులపై పోలీసులు లాఠీఛార్జ్‌ చేశారని పేర్కొన్నారు.
టీచర్‌ రిక్రూట్‌మెంట్‌ కేసు
వివాదాస్పదమవుతున్న సమయంలో ఉపాధ్యాయుల రిక్రూట్‌ మెంట్‌ విషయంలోనూ పలు అభ్యంతరాలు కనిపించడం గమనార్హం. ఇలా కొన్నిసార్లు పేపర్ అవుట్‌ సమస్య తెరపైకి వచ్చింది, మరియు ఎంపిక చేసిన అభ్యర్థుల మధ్య కొన్నిసార్లు అతివ్యాప్తి గురించి చర్చ జరిగింది. వ్రాత పరీక్షలో అడిగే చాలా ప్రశ్నలు కూడా అఫ్‌ కోర్స్‌ అని ప్రకటించబడ్డాయి. ఐతే అదే సమయంలో 150కి 143 మార్కులు సాధించి అందరినీ షాక్‌కు గురిచేసిన టాపర్‌ని అరెస్ట్‌ చేసిన కథ కూడా వార్తల్లోకెక్కింది. ఇలా యోగి పాలనలో అవినీతిమయమైన అధ్యాపకుల భర్తీ ప్రక్రియతో పాటు, పోలీసులు రెచ్చిపోతున్న తీరుపై సర్వత్రా విమరÊశలు వెల్లువెత్తుతున్నాయి.
