- బీహార్‌లోని భవానీపూర్‌లో ఘటన
పాట్నా: ఉత్తరాది రాష్ట్రమైన బీహార్‌లో దారుణ ఘటన చోటుచేసుకుంది. పశువులను దొంగిలించడానే ఆరోపణలతో ఓ 50 ఏండ్ల వ్యక్తిని సామూహికంగా కర్రలతో దాడి ప్రాణాలు తీశారు. ఈ ఘటన రాష్ట్రంలోని అరారియా జిల్లాలోని భవానీపూర్‌లో చోటుచేసుకుంది. వివరాల్లోకెళ్తే.. భవానీపూర్‌కు చెందిన ఓ నివాసి పశువులను దొంగిలించడానికి పలువురు వచ్చారని పేర్కొంటూ గ్రామస్తులకు తెలియజేయడంతో.. గుంపుగా వెళ్లిన పలువురు ఓ వ్యక్తిని కర్రలతో తీవ్రంగా దాడిచేసి చంపారు. దొంగిలించడానికి వచ్చిన వ్యక్తులు పొగమంచు కారణంగా తప్పించుకున్నారనీ, వారిలో ఒకరు పట్టుబడటంతో తీవ్రంగా దాడిచేసి ప్రాణాలు తీశారని ఫుల్కాహా పోలీస్‌ స్టేషన్‌ ఇన్‌ఛార్జి నగినా కుమార్‌ చెప్పారు. గ్రామ ప్రజలు వారిని వెంబడిస్తున్న క్రమంలో ఒకరు తుపాకితో కాల్పులు సైతం జరిపినట్టు తెలిపారు. ప్రజలు పట్టుకుని కర్రలతో కొట్టడంతోటి మహమ్మద్‌ సిద్ధిఖీ అనే వ్యక్తి చనిపోయాడని చెప్పారు. ఈ ఘటనపై ఎఫ్‌ఐఆర్‌ నమోదుచేసుకున్న పోలీసులు.. ఆ వ్యక్తిపై దాడిచేసిన వారిని గుర్తించడానికి భవానీపూర్‌ నివాసితులతో మాట్లాడుతున్నారు.
