- పెట్రోల్‌, డీజిల్‌పై రూ.2 అదనపు పన్ను
- అక్టోబర్‌ నుంచి ఢిల్లీలో రూ.2.5 భారం
న్యూఢిల్లీ: ఐదు రాష్ట్రాల్లో అసెంబ్లీ ఎన్నికలు ఉండటంతో ఇంధన ధరల్ని మోడీ సర్కార్‌ పెంచలేదు. అయితే మోడీ ప్రభుత్వం ప్రవేశపెట్టిన బడ్జెట్‌లో ఎన్నికలయ్యాక..మీ అంతు చూస్తామనేలా బడ్జెట్‌లో పెట్రోల్‌,డీజిల్‌ పై అదనపు పన్ను వేస్తామని ప్రకటించింది. నాన్‌ బ్లెండెడ్‌ పెట్రోల్‌, డీజిల్‌ పై అదనంగా రూ.2 ఎక్సైజ్‌ సుంకం విధిస్తున్నట్టు బడ్జెట్‌ లో ప్రకటించారు. అంటే ప్రస్తుతం పెట్రోల్‌పై లీటరుకు రూ.27.90గా ఉన్న ఎక్సైజ్‌ సుంకం రూ.29.90కి పెరగనున్నది. అదేవిధంగా డీజిల్‌పై సుంకం రూ.21.80 నుంచి రూ.23.80కి పెరగనున్నది.
   పెట్రోల్‌, డీజిల్‌పై ఈ పన్ను 2022 అక్టోబర్‌ 1 నుంచి అమల్లోకి రానున్నది. ఉత్తరప్రదేశ్‌, పంజాబ్‌, గోవా సహా ఐధు రాష్ట్రాల్లో జరగనున్న అసెంబ్లీ ఎన్నికలను దృష్టిలో ఉంచుకుని.. ఎన్నికల తర్వాత పెట్రోల్‌, డీజిల్‌ ధరలను పెంచాలని నిర్ణయించారు. దీని భారం సామాన్యులపై పడితే పెట్రోలుకు రెండున్నర రూపాయల వరకు అదనంగా చెల్లించాల్సి వస్తోంది.
నాన్‌ బ్లెండింగ్‌ అంటే...?
   పెరుగుతున్న కాలుష్యాన్ని తగ్గించడానికి, ప్రభుత్వం పెట్రోల్‌ , డీజిల్‌లో ఇథనాల్‌ కలపడాన్ని ప్రోత్సహిస్తోంది. మిశ్రమ ఇంధనంలో ఇథనాల్‌ కలుపుతున్నారు. మీరు ఇప్పుడు తీసుకుంటున్న సాదా పెట్రోల్‌-డీజిల్‌ నాన్‌-బ్లెండెడ్‌. అదనపు ప్రీమియం, స్పీడ్‌ వంటి పెట్రోల్‌-డీజిల్‌ మిశ్రమాలు ఉంటాయి. ఇలాంటి పరిస్థితుల్లో ఇంధనంలో కలపడాన్ని ప్రోత్సహించేందుకు ప్రభుత్వం ఈ చర్య తీసుకుంది. ప్రస్తుతం, పెట్రోల్‌ , డీజిల్‌ విక్రయించిన మొత్తంలో 50 శాతం నాన్‌-బ్లెండింగ్‌.
పెట్రోల్‌ , డీజిల్‌ ఎంత ఖరీదు అవుతాయి?
   ఇక రాజధాని ఢిల్లీ గురించి చెప్పాలంటే ఇక్కడ లీటర్‌ పెట్రోల్‌ రూ.95.41కి విక్రయిస్తున్నారు. వివిధ పన్నులు , కమీషన్లు కూడా ఇందులో ఉన్నాయి. ఎక్సైజ్‌ సుంకాన్ని రూ.2 పెంచితే పెట్రోల్‌, డీజిల్‌ ధర రూ.2.50 పెరగవచ్చు.
పన్నులో ప్రధాన భాగం పెట్రోలే....
   పెట్రోల్‌ గురించి మాట్లాడుకుంటే, ఇప్పుడు బేస్‌ ధర, సరుకు రవాణా, ఎక్సైజ్‌ సుంకం, డీలర్‌ కమీషన్‌ జోడించాక.. దాని మొత్తం ధర రూ.79.91కి వస్తుంది. దీనిపై ఢిల్లీ ప్రభుత్వం 19.40 శాతం వ్యాట్‌ విధిస్తుంది, ఆ తర్వాత పెట్రోల్‌ ధర లీటరుకు రూ.95.41 అవుతుంది. మరోవైపు, ఎక్సైజ్‌ సుంకాన్ని రూ.2 పెంచితే, రూ.79.91కి బదులుగా రూ.81.91పై 19.40 శాతం పన్ను వస్తుంది. దీని తర్వాత మీరు 1 లీటర్‌ పెట్రోల్‌కు రూ.97.80 చెల్లించాలి. అంటే రూ.2.39 అదనంగా చెల్లించాల్సి ఉంటుంది.
డీజిల్‌ ధరాభారం...?
   డీజిల్‌ గురించి మాట్లాడితే.., ఇప్పుడు బేస్‌ ధర, సరుకు రవాణా, ఎక్సైజ్‌ సుంకం ,డీలర్‌ కమీషన్‌ కలిపాక.. దాని మొత్తం ధర రూ.73.99కి వస్తుంది. దీనిపై ఢిల్లీ ప్రభుత్వం 16.75 శాతం వ్యాట్‌ విధిస్తుంది, ఆ తర్వాత డీజిల్‌ ధర లీటరుకు రూ. 86.67 అవుతుంది. మరోవైపు, ఎక్సైజ్‌ సుంకాన్ని రూ.2 పెంచితే, రూ.73.99కి బదులుగా రూ.75.99పై 16.75 శాతం పన్ను వస్తుంది. దీని తర్వాత, మీరు 1 లీటర్‌ డీజిల్‌కు రూ. 88.72 చెల్లించాలి. అంటే 2.05 ఎక్కువ చెల్లించాల్సి ఉంటుంది. అయితే ఇతర రాష్ట్రాల్లో పన్నులు కలిపితే..వంద నుంచి 110 రూపాయలకు పైనే పెట్రోల్‌ (లీటర్‌ )ధర ఉన్నది. ఇక డీజిల్‌ ధరపైనే వ్యవసాయం,రవాణా రంగాలు ఆధారపడి ఉంటాయి. ఇంధన ధరలపెంపు భారాలన్నీ సామాన్యుల నెత్తిపైనే పడుతున్నాయి.
మూడేండ్లలో పెట్రోల్‌, డీజిల్‌ ద్వారా రూ. 8 లక్షల కోట్లు
   గత మూడేండ్లలో పెట్రోల్‌ , డీజిల్‌పై పన్ను (ఎక్సైజ్‌ సుంకం) విధించడం ద్వారా ప్రభుత్వం 8 లక్షల కోట్లకు పైగా సంపాదించింది. 2020-21లో 3,71,908 కోట్లు, 2019-20లో 2,19,750 కోట్లు, 2018-19లో రూ. 2,10,282 కోట్లు ఎక్సైజ్‌ సుంకం ద్వారా ఖజానాకు చేరాయి. ఇంధన ధరలు అంతర్జాతీయ మార్కెట్‌ లో తగ్గినా..వాహనదారులపై మోడీ సర్కారు భారాలు వేయటానికి కాచుకుని ఉంటుందని సామాన్యుడి ఆవేదన.