న్యూఢిల్లీ : కార్పొరేట్‌ కంపెనీకి ఇలా అమ్మారో లేదో..అప్పుడే ఎయిర్‌ ఇండియా పనితీరుపై మీడియా హోరెత్తిస్తోంది. పైలట్ల నైపుణ్యాలను 'అహో..అద్భుతం..'అంటూ పొగడ్తలతో ముంచెత్తింది. గత వారం రోజులుగా బ్రిటన్‌ సహా పలు యూరప్‌ దేశాలను యూనిస్‌ తుపాన్‌ వణికిస్తోన్న సంగతి తెలిసిందే. ఈదురుగాలులతో కూడిన తుపాన్‌తో ప్రజలు తీవ్ర ఇబ్బందులకు గురౌతున్నారు. ఈ నేపథ్యంలో లండన్‌లోని హిత్రో విమానాశ్రయంలో పలు విమానాలను రద్దు చేయగా.. మరికొన్నింటిని దారి మళ్లించారు. ఇంకొన్ని ఆలస్యంగా నడుస్తున్నాయి. అయితే ఎయిరిండియాకు చెందిన రెండు విమానాలు.. అతి వేగంగా వీస్తున్న ఈదురు గాలుల మధ్యే అత్యంత చాకచక్యంగా వాటిని ల్యాండింగ్‌ చేసిన విధానంపైనే ఇప్పుడు ప్రశంసల వర్షం కురుస్తోంది.