వడోదర : చిన్న రోడ్డు ప్రమాదం.. పెద్ద మత ఘర్షణలు దారి తీసిన ఘటన గుజరాత్‌లోని వడోదరలో జరిగింది. ఈ ఘర్షణల్లో ఇరువర్గాలు ఒకరిపై ఒకరు రాళ్లు రువ్వడంతో పాటు మందిరం ధ్వంసానికి పాల్పడ్డారు. కొన్ని వాహనాలు సైతం ధ్వంసమయ్యాయి. ఈ ఘటన ఆదివారం రాత్రి జరగ్గా.. ముగ్గురికి గాయాలయ్యాయని పోలీసులు సోమవారం తెలిపారు. అల్లర్లకు కారణమైన 19 మందిని పోలీసులు అరెస్టు చేశారు. రోడ్డు ప్రమాదానికి సంబంధించి మరో ముగ్గురిని అరెస్టు చేసినట్టు వెల్లడించారు. పోలీసులు తెలిపిన వివరాల ప్రకారం.. రావుపురా ప్రాంతానికి చెందిన ఇరు మతాలకు చెందిన వ్యక్తులు.. తమ వాహనాలపై వెళుతుండగా కరేలీభాగ్‌ వద్ద ప్రమాదం జరిగింది. దీంతో గొడవ మొదలైంది. అనంతరం ఘర్షణకు దారి తీసింది. ఇరు వర్గాలకు చెందిన ప్రజలు ఒకరిపై ఒకరు రాళ్లు రువ్వుకున్నారు. ఇందులో ఓ గుంపు రోడ్డు ప్రక్కనే ఉన్న మందిరానికి చెందిన విగ్రహాన్ని ధ్వంసం చేసింది.. అదేవిధంగా ఆటో, ఇతర వాహనాలకు కూడా ధ్వంసం చేసిందని పోలీసులు తెలిపారు.
