- యూపీలో దళిత బాలుడిపై దాడి
న్యూఢిల్లీ : దేశంలో నిత్యం ఎక్కడో ఒకచోట దళితులపై దాడులు చోటుచేసుకుంటున్నాయి. కొద్ది రోజుల క్రితం ఉత్తరప్రదేశ్‌లోని రారుబరేలీలో ఒక దళిత బాలుడిపై కొంతమంది అత్యంత పాశవిక దాడికి దిగారు. చెవులు పట్టుకొని మండుటెండలో దళిత బాలుడ్ని కూర్చోబెట్టారు. చెంపలేసుకోమంటూ బెదిరించారు. ఆ బాలుడుతో బలవంతంగా కాళ్లు నాకించి...పైశాచిక ఆనందాన్ని పొందారు. ఇదంతా వీడియో చిత్రీకరించిన ఒక వ్యక్తి సోషల్‌మీడియాలో పెట్టేసరికి..ఘటన చాలా ఆలస్యంగా వెలుగులోకి వచ్చింది. ఉత్తరప్రదేశ్‌లో దళితుల పరిస్థితి ఎంత దయనీయంగా తయారైందో ఈ ఘటన అద్దంపడుతోంది. ఈ ఘటనపై స్పందించిన స్థానిక పోలీసులు, బాలుడిపై దాడికి దిగిన ఏడుగురు వ్యక్తుల్ని అదుపులోకి తీసుకున్నామని ప్రకటించారు. ఏప్రిల్‌ 10న రారుబరేలీలోని ఒక మైదానంలో దాడి ఘటన జరిగింది. ఠాకూర్‌ సామాజికవర్గానికి చెందిన కొంతమంది మోటార్‌ సైకిళ్లతో చుట్టుముట్టి బాలుడ్ని తీవ్రంగా బెదిరించారని, చెవులు పట్టుకొని కింద కూర్చోమన్నారని...ఇదంతా వీడియో చిత్రీకరణలో ఉందని పోలీసులు తెలిపారు.