అమరావతి : తమిళనాడు పిడిఎస్‌ బియ్యాన్ని ఎపి రైస్‌ మాఫియా తరలిస్తోందని ఆ రాష్ట్ర సిఎం స్టాలిన్‌కు టిడిపి అధినేత చంద్రబాబు సోమవారం లేఖ రాశారు. తమిళనాడు నుంచి బియ్యం ఏఏ మార్గాల్లో ఎపిలోకి ప్రవేశిస్తుందో కూడా ఆయన లేఖలో ప్రస్తావించారు. స్మగ్లింగ్‌ చేస్తూ పట్టుబడ్డ వాహనాలు, స్మగ్లర్ల ఫొటోలను కూడా స్టాలిన్‌కు రాసిన లేఖకు చంద్రబాబు జతపరిచారు. తమిళ పేదలకు చెందాల్సిన పిడిఎస్‌ బియ్యాన్ని ఆంధ్రా-తమిళనాడు సరిహద్దుల మీదుగా రాష్ట్రంలోకి తరలిస్తున్నారన్నారు. తమిళనాడు-చిత్తూరు సరిహద్దులోని ఏడు మార్గాల ద్వారా రైస్‌ మాఫియా బియ్యాన్ని తరలిస్తున్నట్లు తెలిపారు. తమిళనాడు-ఆంధ్రా సరిహద్దులో నిఘా పెంచాలని స్టాలిన్‌ను కోరారు. ఎపితోపాటు కర్ణాటకకు కూడా కొంతమేర బియ్యం అక్రమంగా రవాణా అవుతోందన్నారు. లేఖ ప్రతిని చంద్రబాబు ఆ రాష్ట్ర ప్రభుత్వ ప్రధాన కార్యదర్శికి కూడా పంపించారు.
