- హ్యారీ పోటర్‌ రచయిత్రి జెకె రౌలింగ్‌కు చంపేస్తామంటూ బెదిరింపు
న్యూఢిల్లీ : ప్రముఖ రచయిత్రి జెకె రౌలింగ్‌ను చంపేస్తామంటూ బెదిరింపు వచ్చింది. ప్రముఖ రచయిత సల్మాన్‌ రష్దీపై జరిగిన దాడిని ఖండిస్తూ హ్యారీ పోటర్‌ రచయిత రౌలింగ్‌ ట్వీట్‌ చేయగా.. ఆమెకు ఈ బెదిరింపు వచ్చింది. ఓ వినియోగదారుడి నుండి వచ్చిన ఈ బెదిరింపులకు సంబంధించిన సందేశానికి సంబంధించిన స్క్రీన్‌షాట్‌ను ఆమె ట్విట్టర్‌లో పంచుకున్నారు. ఈ ఘటనపై స్పందిస్తూ... దాడి గురించి తెలియగానే నీరసంచినట్లుగా అనిపించిందని, ఆయన ఆరోగ్యం కుదుటపడుతుందని భావిస్తున్నానని ఆమె ట్వీట్‌ చేశారు. అయితే ఓ వినియోగదారుడు బదులుగా ' చింతించకండి. తర్వాత మీరే' అంటూ ట్వీట్‌ చేశాడు. న్యూయార్క్‌లో ఓ సాహిత్య కార్యక్రమంలో పాల్గొన్న సల్మాన్‌ రష్దీని హదీమటర్‌ అనే దుండగుడు పలుమార్లు కత్తితో పొడిచిన సంగతి విదితమే. ఆయన్ను ఎయిర్ అంబులెన్స్‌లో తరలించి చికిత్స అందిస్తున్నారు. ప్రస్తుతం ఆయన వెంటిలేటర్‌పైనే ఉన్నారు. ఇంకా రష్దీ ఆరోగ్యం ఆందోళనకరంగానే ఉన్నట్లు తెలుస్తోంది.
