- ప్రయివేట్‌ మైనింగ్‌ నిబంధనలు సవరణ
- నేరంగా పరిగణించే 68 నిబంధలను తొలగింపు
- సగానికి సగం తగ్గించిన పెనాల్టీ
న్యూఢిల్లీ: ప్రయివేట్‌ వ్యక్తులు బొగ్గు మైనింగ్‌ చేసేందుకు అనుకూలంగా నిబంధనలను కేంద్ర ప్రభుత్వం సవరించింది. చట్టంలోని నేరంగా పరిగణించే 68 నిబంధనలను నేర రహితంగా సవరించింది. కేంద్ర బొగ్గు మంత్రిత్వ శాఖ మినరల్‌ కన్సెషన్‌ రూల్స్‌- 1960 (ఎంసీఆర్‌)ని తన నిబంధనలను నేరరహితం చేసే ఉద్దేశంతో సవరించింది. ఎంసీఆర్‌ నిఘా అనుమతి, ప్రాస్పెక్టింగ్‌ లైసెన్స్‌, మైనింగ్‌ లీజు వంటి ఖనిజ రాయితీల దరఖాస్తు, మంజూరును నియంత్రిస్తుంది. ఈ రాయితీలు గనుల అభివృద్ధి, నిర్వహణ కోసం వ్యాపారాలకు అనేక అనుకూలంగా ఉంటుంది. వ్యాపారులకు వర్తింపులను తగ్గించడానికి ప్రభుత్వం చొరవ తీసుకుంటోంది. ప్రభుత్వం 'ఈజ్‌ ఆఫ్‌ డూయింగ్‌ బిజినెస్‌' విధానాన్ని మరింత ప్రోత్సహించడానికి, పెంచడానికి ఎంసీఆర్‌లోని సవరణ చేస్తూ 68 నిబంధనలను నేరరహితం చేసింది. అయితే ఎంసీఆర్‌లో పది నిబంధనలకు జరిమానా తగ్గించింది. అదనపు, కొరత రాయల్టీ సర్దుబాటు కోసం ఎక్స్‌ప్రెస్‌ నిబంధన ప్రవేశపెట్టబడింది. ఇంకా, ప్రభుత్వం చెల్లించాల్సిన అద్దె, రాయల్టీ, రుసుము, ఇతర మొత్తాలను ఆలస్యంగా చెల్లించడంపై జరిమానా వడ్డీ రేటు 24 శాతం నుంచి 12 శాతానికి తగ్గించింది. ఈ నిబంధనలు బొగ్గు గనుల రంగంలో చాలా అవసరమైన ఆర్థిక సడలింపులను కల్పిస్తాయని కేంద్ర ప్రభుత్వం భావిస్తోంది.