- హిందూ, ముస్లింల మధ్య ఎలాంటి ఘర్షణ లేదు
- మతం పేరుతో బీజేపీ అల్లర్లకు యోచన
- దేశాన్ని నాశనం చేసేవారిని తరిమికొట్టాలి: సమ్మాన్‌ దివస్‌ ర్యాలీలో ప్రతిపక్ష నేతలు
న్యూఢిల్లీ: 'బీజేపీని గద్దెదించడంతోనే దేశాన్ని కాపాడుకోగలం. బీజేపీ దుష్టపాలనను అంతమొందించేందుకు ప్రతిపక్ష పార్టీలన్ని ఏకతాటిపైకి వస్తే బీజేపీకి ఓటమి తప్పదు. ఎన్డీఏ ఇప్పుడు లేదు. శివసేన, జేడీయూ, ఎస్‌ఏడీ వంటి పార్టీలు ఒక్కొక్కటి బయటకు వచ్చాయి. ప్రతిపక్ష పార్టీల సంఖ్య,బలం పెరుగుతోంది. అన్ని ప్రతిపక్ష పార్టీలు కలిసి పాలనను మారుస్తాయి. అందుకోసం అందరం కృషి చేయాలి'' అంటూ ప్రతిపక్ష నేతలు పిలుపు నిచ్చారు. మాజీ ఉప ప్రధాని చౌదరి దేవిలాల్‌ 109 జయంతి సందర్భంగా ఆదివారం హర్యానాలోని ఫతేహాబాద్‌లోని ఇండియన్‌ నేషనల్‌ లోక్‌దళ్‌ (ఐఎన్‌ఎల్‌డీ) సమ్మాన్‌ దివస్‌ ర్యాలీ నిర్వహించింది. హర్యానా మాజీ ముఖ్యమంత్రి ఓం ప్రకాశ్‌ చౌతాలా ఆధ్వర్యంలో జరిగిన ఈ భారీ ర్యాలీలో వివిధ పార్టీల నేతలు పాల్గొన్నారు.
బీజేపీ ద్వేషపూరిత ఆలోచనలను ప్రజలు ఓడిస్తారు: సీతారాం ఏచూరి
          ''దేశాన్ని, దాని నీతిని నాశనం చేయడంతో బీజేపీ తప్పించుకోవాలని చూస్తోంది. అది అనుమతించబడదు. ప్రజలు ఒకరినొకరు ద్వేషించుకునేలా చేసి లాభపడాలని బీజేపీ చూస్తోంది. వారి ప్రమాదకరమైన ఆలోచనలను ప్రజలు ఓడిస్తారు'' అని సీపీఐ(ఎం) ప్రధాన కార్యదర్శి సీతారాం ఏచూరి అన్నారు. దేశంలో ధనవంతులు మరింత ధనవంతులవుతున్నారనీ, పేదలు మరింత పేదలవుతు న్నారని పేర్కొన్నారు. దేశంలో ప్రజల బతుకులు చిధ్రమవుతున్నాయన్నారు. దేశం ఆస్తులను అదానీ, అంబానీలు కొల్లగొడుతున్నారని విమర్శించారు. ''ఈ ప్రభుత్వ రంగ కంపెనీలకు దేశ ప్రజలే యజమానులు. ఆయన మేనేజర్‌ మాత్రమేనని మనమందరం మన ప్రధానికి చెప్పాలి. మేనేజర్‌ ప్రజలకు చెందిన ఆస్తులను విక్రయించడానికి ప్రయత్నిస్తే, మేము మేనేజర్‌ను మార్చేస్తాం '' అని పేర్కొన్నారు. ''మనం మన దేశాన్ని కాపాడుకోవాలంటే, బీజేపీని అధికారం నుంచి తొలగించాలి. ఇది మన్‌ కీ బాత్‌ కాదు. ఇది దిల్‌ కీ బాత్‌'' అని ఏచూరి అన్నారు. కేరళలాగా అన్ని రాష్ట్రాలను తీర్చిదిద్దాలనీ, కేరళలో బీజేపీకి ఒక ఎమ్యెల్యే ఉండేవాడని, గత ఎన్నికల్లో ఆ స్థానాన్ని కూడా సీపీఐ(ఎం) కైవసం చేసుకున్నదని తెలిపారు. దీంతో ఇప్పుడు బీజేపీ ఎమ్మెల్యే సున్నా అని, ఇతర రాష్ట్రాల్లో కూడా బీజేపీని జీరో చేయాలని పిలుపు నిచ్చారు. మతోన్మాద శక్తులను నిర్వీర్యం చేసే ఏ పోరాటంలోనైనా ఎర్ర జెండా తన వెంట ఉంటుందని స్పష్టం చేశారు.
దేశాన్ని నాశనం చేసేవారిని తరిమికొట్టాలి: నితీశ్‌ కుమార్‌ (బీహార్‌ సీఎం)
బీహార్‌ ముఖ్యమంత్రి నితీశ్‌ కుమార్‌ మాట్లాడుతూ హిందువులు, ముస్లింల మధ్య ఎటువంటి ఘర్షణ లేదనీ, బీజేపీ మాత్రం మతం పేరుతో అల్లర్లు సష్టించాలనుకుంటోందని ఆగ్రహం వ్యక్తంచేశారు. బీజేపీని ఎదుర్కోవడానికి కాంగ్రెస్‌, వామపక్షాలతో సహా అన్ని ప్రతిపక్ష పార్టీలను ఏకం కావాలని పిలుపు నిచ్చారు. ''ప్రతిపక్షాల ప్రధాన ఫ్రంట్‌'' కాషాయ రంగును ప్రతిఘటిస్తోందనీ, 2024 సార్వత్రిక ఎన్నికల్లో పార్టీ ఘోరంగా ఓడిపోయిందని తెలిపారు. ఇక్కడ ప్రారంభమయ్యేది మూడో ఫ్రంట్‌ కాదనీ, కేంద్రంలోని బీజేపీని గద్దెదించే మొదటి ఫ్రంట్‌ అని పేర్కొన్నారు. బీజేపీయేతర పార్టీలన్నీ ఏకమైతే దేశాన్ని నాశనం చేయడానికి పని చేస్తున్న వారిని తరిమికొట్టగలమని అన్నారు. జాతీయ స్థాయిలో మనమంతా ఒక్కతాటిపైకి రావాలన్నదే నా కోరిక.. మరిన్ని పార్టీలను ఏకతాటిపైకి తీసుకురావాలి, నేను ప్రధాని అభ్యర్థిని కాదు. మూడో కూటమనే ప్రశ్నే లేదు. ఒకే కూటమి ఉంటుంది. 2024 ఎన్నికల్లో బీజేపీని ఓడిస్తాం'' అని అన్నారు.
అందరం కలిసి బీజేపీ పాలనను మారుస్తాం: శరద్‌ పవార్‌
2024లో కేంద్రంలో ప్రభుత్వం మారేలా ప్రతి ఒక్కరూ కృషి చేయాల్సిన సమయం ఆసన్నమైందని ఎన్‌సీపీ అధినేత శరద్‌ పవార్‌ అన్నారు. ''రాజస్థాన్‌, పంజాబ్‌, హర్యానా, పశ్చిమ ఉత్తరప్రదేశ్‌ రైతులు తమ ప్రాణాలను త్యాగం చేశారు. వారు ఏడాది పాటు శాంతియుతంగా పోరాడారు. కాని వారిపై క్రిమినల్‌ కేసులు పెట్టారు. కేసులను ఉపసంహరించుకుంటామని మోడీ ప్రభుత్వం హామీ ఇచ్చింది. కానీ ఇప్పటి వరకు అమలు చేయలేదు. నేడు, రైతులు న్యాయస్థానాలకు హాజరుకావలసి వస్తుంది. మరోవైపు రైతుల ఆత్మహత్యలు పెరిగాయి. ప్రతి గంటకు, ఎక్కడో ఒక రైతు ఆత్మహత్య చేసుకున్నట్టు చదువుతున్నాం. అలాంటి పరిస్థితులను సృష్టించే వారిని మనం తొలగించాలి. 2024లో మనకు అవకాశం వచ్చినప్పుడు, మనమందరం కలిసి బీజేపీ పాలనను మారుస్తాం'' అని శరద్‌ పవార్‌ పేర్కొన్నారు. రైతులు, యువకుల ఆత్మహత్యలు పరిష్కారం కాదని, ప్రభుత్వంలో మార్పు తీసుకురావడమే నిజమైన పరిష్కారమని సూచించారు.
రాజ్యాంగం, ప్రజాస్వామ్యాన్ని కాపాడాలి: తేజస్వి యాదవ్‌
రాజ్యాంగాన్ని, ప్రజాస్వామ్యాన్ని కాపాడేందుకు బీజేపీ నేతృత్వంలోని ఎన్‌డీఏ నుంచి జేడీయూ, ఎస్‌ఏడీ, శివసేన వైదొలిగాయని ఆర్జేడీ నేత, బీహార్‌ ఉప ముఖ్యమంత్రి తేజస్వీ యాదవ్‌ అన్నారు. ఆయా పార్టీలు వైదొలిగాక, ఇప్పుడు ఎన్‌డీఏ ఎక్కడ ఉందని ప్రశ్నించారు. బీజేపీ నియంతృత్వ పాలనను అంతమొందించేందుకే నితీశ్‌ కుమార్‌ ఎన్‌డీఏ కూటమి నుంచి వైదొలిగారని, బీహార్‌లో బీజేపీకి పునరుజ్జీవం ఉండదని పేర్కొన్నారు. ఎన్‌డీఏ మునిగే నావ నుంచి ఒక్కో పార్టీ బయటపడుతోందని తెలిపారు. ఇక మిగిలేది బిజెపి మాత్రమేనని స్పష్టం చేశారు. మోడీ హయంలో నిరుద్యోగం, ద్రవ్యోల్బణం దారుణంగా పెరిగిపోయాయని విమర్శించారు. ఇండియన్‌ ఆర్మీని కూడా కాంట్రాక్ట్‌ లేబర్‌గా మార్చేశారని ఆరోపించారు. యువతను మోసం చేసిన మోడీ సర్కార్‌ను గద్దె దించడమే తమ ఏకైక లక్ష్యమని స్పష్టం చేశారు. బీజేపీ తప్పుడు వాదనలు, వాగ్దానాలు చేస్తోందని ఆరోపించారు. ఆ పార్టీ ్ద అబద్ధాల పార్టీ అని ధ్వజమెత్తారు. బీహార్‌ ప్రభుత్వం ప్రజలకు ఉద్యోగాలు ఇప్పించేందుకు కసరత్తు ప్రారంభించగా, కేంద్రంలోని బీజేపీ ప్రభుత్వం ఉద్యోగాలు కల్పిస్తామన్న హామీని నెరవేర్చలేకపోయిందని ఆరోపించారు.
కొత్త కూటమి ఏర్పాటు చేయాలి: సుఖ్‌బీర్‌ సింగ్‌ బాదల్‌
భావసారూప్యత గల పార్టీలు ఐక్య ఫ్రంట్‌ను ఏర్పాటు చేయాలని శిరోమణి అకాలీదళ్‌ అధ్యక్షుడు సుఖ్‌బీర్‌ సింగ్‌ బాదల్‌ పిలుపు నిచ్చారు. దేశంలో బీజేపీ బలహీనమైన శక్తిగా ఉన్నప్పుడు ఎన్డీఏ కూటమి ఏర్పడిందని అన్నారు. అప్పుడు తమ పార్టీతో పాటు శివసేన, జేడీయూలతో కలిసి 'అసలు ఎన్డీఏ' ఏర్పడిందని గుర్తు చేశారు. ''అసలు ఎన్‌డీఏ ఇక్కడ కూర్చొని ఉన్నది. అది శివసేన, అకాలీదళ్‌, జేడీయూలు కలిసి స్థాపించినట్టు తెలిపారు. బీజేపీ చిన్న పార్టీగా ఉన్నప్పుడు ఆపార్టీకి మేం అండగా నిలిచాం. కానీ ఇప్పుడు రైతులు, కార్మికుల కోసం ఒక కూటమిని ఏర్పాటు చేయాల్సిన సమయం వచ్చింది'' బాదల్‌ అన్నారు. భావసారూప్యత ఉన్న పార్టీలన్నీ రైతులు, వ్యవసాయ కూలీల జెండా కింద ఏకమై వారి సంక్షేమం కోసం పాటుపడాల్సిన సమయం ఆసన్నమైందన్నారు. ఈ కార్యక్రమంలో ఐఎన్‌ఎల్‌డీ ప్రధాన కార్యదర్శి అభరు చౌతాలా, అరవింద్‌ సావంత్‌ (శివసేన), కెసి త్యాగి (జేడీయూ), మేవర్‌ కుమార్‌ జమాటియా (ఐపీఎఫ్‌టీ) 11 రాష్ట్రాలకు చెందిన నేతలు హాజరయ్యారు. డీఎంకే, టీఎంసీ, టీడీపీ, టీఆర్‌ఎస్‌, ఎస్‌పీ, జేడీఎస్‌ తదితర పార్టీల నేతలు హాజరు కాలేదు.