- నోటిఫికేషన్‌పై సవాల్‌ చేయడం సాధ్యం కాదు
- జమ్ముకాశ్మీర్‌ అసెంబ్లీ సీట్ల పెంపుపై కేంద్రం
- సుప్రీంకోర్టులో అఫిడవిట్‌ దాఖలు చేసిన కేంద్రం, ఈసీఐ
న్యూఢిల్లీ : జమ్మూ కాశ్మీర్‌ అసెంబ్లీ నియోజకవర్గాల పునర్విభజన ఆర్డర్‌ గెజిట్‌ నోటిఫికేషన్‌ను సవాల్‌ చేయడం సాధ్యంకాదని కేంద్ర ప్రభుత్వం, కేంద్ర ఎన్నికల సంఘం, జమ్మూకాశ్మీర్‌ స్పష్టం చేశాయి. మరోవైపు పునర్విభజనకు సంబంధించి కమిషన్‌ ఏర్పాటు, పరిధి, పదవీకాలం, అధికారాలు అమలుచేస్తూ కేంద్రం గెజిట్‌ విడుదల చేసిన నేపథ్యంలో దీనిపై ఎలాంటి వ్యాఖ్యలు చేయదలచుకోలేదని కేంద్ర ఎన్నికల సంఘం పేర్కొంది. జమ్మూ కాశ్మీర్‌ అసెంబ్లీ నియోజకవర్గాల పునర్విభజన ప్రక్రియను సవాల్‌ చేస్తూ హజీ అబ్దుల్‌ గని ఖాన్‌, మహమూద్‌ ఆయూబ్‌ మట్టూ సుప్రీం కోర్టులో దాఖలు చేసిన పిటిషన్‌లో కేంద్ర ప్రభుత్వం, జమ్మూకాశ్మీర్‌, ఈసీఐలు కౌంటరు అఫిడవిట్‌ చేశాయి. అయితే, ఇదే కేసుతో ఏపీ, తెలంగాణ అసెంబ్లీ సీట్లు పెంపునకు సంబంధించి ఏపీ విభజన చట్టం అమలు చేయాలని పురుషోత్తంరెడ్డి దాఖలు చేసిన పిటిషన్‌ను జత చేసిన విషయం విదితమే.
నియోజకవర్గాల పునర్విభజనపై కమిషన్‌ ఏర్పాటై రెండేండ్లు గడిచిందని కేంద్రం తరఫు హోంశాఖ, జమ్మూ కాశ్మీర్‌ (యూటీ) గుర్తుచేశాయి. కమిషన్‌ తన పని పూర్తి చేసిందనీ, ఆదేశాలు కూడా గెజిట్‌ విడుదల చేశామని పేర్కొన్నాయి. పిటిషనర్లు సకాలంలో పిటిషను దాఖలు చేయడంలో విఫలమయ్యారని తెలిపాయి. నియోజకవర్గాల పునర్విభజనపై ఏర్పాటయిన కమిషన్‌ గెజిట్‌లో ప్రచురణ తర్వాత డిలిమిటేషన్‌ చట్టం, 2002లోని సెక్షన్‌ 10(2) ప్రకారం సవాల్‌ చేయడం సాధ్యం కాదని కేంద్రం పేర్కొంది. మేఘరాజ్‌ కొఠారి వర్సెస్‌ డిలిమిటేషన్‌ కమిషన్‌ కేసులో ఈ సెక్షన్‌ను ఇప్పటికే కోర్టు సమర్థించిందని గుర్తు చేసింది. పిటిషన్లు అనుమతిస్తే గెజిట్‌ నిష్ఫలం అవుతుందని, ఇది రాజ్యాంగంలోని ఆర్టికల్‌ 329ని ఉల్లంఘించడమేనని తెలిపింది. జమ్మూ కాశ్మీర్‌ పునర్‌వ్యవస్థీకరణ చట్టం, 2019పై అవగాహన లేకుండా పిటిషనర్లు కోర్టును ఆశ్రయించినట్లు ఉన్నారని తెలిపింది. చట్టంలోని సెక్షన్‌ 62 ప్రకారం కమిషన్‌ ఏర్పాటు చేసినందున ప్రత్యేకించి ఎలాంటి చర్యలు తీసుకోవాల్సిన అవసరం లేదని ఎన్నికల సంఘం పేర్కొందని తెలిపింది. 2019 చట్టంలోని సెక్షన్‌ 60, 61, 62ల మధ్య ఎలాంటి వైరుధ్యం లేదని తెలిపింది.
రాజ్యాంగంలోని ఆర్టికల్‌ 170ను ఉల్లంఘిస్తున్నారన్న పిటిషనర్ల వాదనను పరిగణనలోకి తీసుకోవద్దని, పంజాబ్‌ పునర్‌ వ్యవస్థీకరణ చట్టం రాజ్యాంగబద్ధతను సవాల్‌ చేస్తూ దాఖలైన పిటిషన్‌లో రాజ్యాంగ ధర్మాసనం ఇచ్చిన తీర్పును హౌంశాఖ ప్రస్తావించింది. మొదటి, నాలుగో షెడ్యూళ్లను సవరించడం లేదా ఏదైనా అనుబంధ పర్యవసాన నిబంధనలు రూపొందించే ఏదైనా చట్టాన్ని ఆర్టికల్‌ 368తో పోల్చుతూ రాజ్యాంగ సవరణగా పరిగణించరాదని రాజ్యాంగ ధర్మాసనం స్పష్టం చేసిన విషయాన్ని గుర్తుచేసింది.
డీలిమిటేషన్‌ రాజ్యాంగ ఆదేశాలు, పరిధి, పదవీకాలాలకు సంబంధించిన అధికారాలు అమలు చేస్తూ కేంద్రం ఆమోదించిన విషయాన్ని గుర్తుచేసిన కేంద్ర ఎన్నికల సంఘం దీంట్లో వాఖ్యానించదలచుకోలేదని పేర్కొంది. డిలిమిటేషన్‌కు సంబంధించి గెజిట్‌ విడుదలైన సందర్భంలో ఆర్టికల్‌ 329(2) ప్రకారం న్యాయపరమైన జోక్యం అవసరం లేదని పేర్కొంది. ఒకసారి గెజిట్‌లో ప్రచురితమైన ఆర్డర్‌లో మార్పు కోరుతూ కోర్టు ముందు ప్రశ్నించే అవకాశం లేదని మేఘరాజ్‌ కొఠారి వర్సెస్‌ డిలిమిటేషన్‌ కమిషన్‌ కేసులో సుప్రీంకోర్టు స్పష్టం చేసిందని తెలిపింది. డిలిమిటేషన్‌ కమిషన్‌ తుది ఆర్డర్‌ ప్రచురితవడానికి ముందుగా ప్రజాభిప్రాయసేకరణ సమావేశాలు నిర్వహించడంతోపాటు కమిషన్‌కు లిఖిత, మౌఖికంగా అభిప్రాయాలు తెలిపే అవకాశం ప్రజలకు కల్పించినట్లు ఎన్నికల సంఘం అఫిడవిట్‌లో పేర్కొంది.
2011 జనాభా లెక్కలు అనుసరించి జమ్మూకాశ్మీర్‌లో నియోజకవర్గాల పునర్విభజన చేపడుతున్నారని, 2011లో జమ్ము కశ్మీర్‌లో ఎలాంటి జనాభా లెక్కల సేకరణ చేపట్టలేదని ఇది రాజ్యాంగ విరుద్ధమని పిటిషనర్లు ఆరోపించారు. జమ్మూకాశ్మీర్‌లో అసెంబ్లీ నియోజకవర్గాల సీట్లు 107 నుంచి 114కు పెంచడం ఆర్టికల్‌ 81, 82, 170, 330, 332లతోపాటు జమ్ము కశ్మీర్‌ పునర్విభజన చట్టం, 2019లోని సెక్షన్‌ 63కు వ్యతిరేకమని పేర్కొన్నారు. జనాభాకు అనుగుణంగా లేని మార్పులు కూడా కేంద్రపాలిత చట్టంలోని సెక్షన్‌ 39ని ఉల్లంఘించడమేనని పిటిషనర్లు కోర్టు దృష్టికి తీసుకెళ్లారు.
